Сямімесячнае дзіця выратавала ад гвалтоўнай смерці бацьку-таксіста: выпадак у Маладзечне
У нядзелю двое маладзечанцаў звязалі 27-гадовага таксіста, хацелі яго задушыць, але даведаўшыся, што ў таго малое дзіця, зжаліліся і адпусцілі.
29.04.2013 / 15:07
У ноч на 28 красавіка таксіст стаяў на прывакзальнай плошчы Маладзечна. У 00.30 да яго падышлі два маладзёны і папрасілі падвезці да вёскі Лебедзева.
Таксіст назваў сваю цану — 100 тысяч рублёў, у выніку хлопцы старгаваліся на 85 тысячах.
На месцы, у Лебедзеве, аказалася, што грошай у хлопцаў няма. Маладыя людзі збілі таксіста, звязалі і забралі 200 тысяч рублёў ды залаты пярсцёнак. Пачалі душыць кіроўцу, а той стаў жаліцца, што яго сямімесячнае дзіця застанецца сіратой.
Адзін са зладзеяў зжаліўся. Таксіста развязалі і высадзілі ў раёне вёскі Маркава. Самі нападнікі паехалі далей на яго машыне. У 3.30 кіроўца дабраўся да міліцыі.
ДАІ ўвяло план «Перахоп» і ў 4.30 маладзёнаў затрымалі. Аднаму з іх 28 гадоў, а другому – 23 гады. Заведзена крымінальная справа па артыкуле «Рабаванне».