Хрысціянства для «чайнікаў»: Вера бацькоў?
Тры абзацы ад уніяцкага святара.
02.10.2013 / 23:02
Многія беларусы называюць сабе хрысціянамі і прыходзяць у храм. Калі некаторых з іх запытацца, навошта яны так робяць, яны адкажуць: «Мае бацькі хадзілі, дзяды хадзілі і я хаджу». З гэтага адказу ясна: людзі ходзяць «па інерцыі», у найлепшым выпадку «да Бога сваіх бацькоў».
Аднак не ў гэтым сапраўднае хрысціянства. Сапраўднае хрысціянства ў тым, каб прыходзіць да свайго Бога. Каб так было, трэба шукаць асабістых адносінаў з Богам ды абгрунтоўваць сваю веру.
Што такое абгрунтоўваць сваю веру? Гэта значыць адказаць сабе на пытанні: чаму я веру ў Бога? навошта я веру ў Хрыста, а не ў іншага бога? чаму я прыходжу ў храм гэтай канфесіі, а не іншай? Каб адказаць на гэтыя пытанні, трэба чытаць Біблію, Катэхізіс і задаваць пытанні святару. Калі не абгрунтаваць сваю веру, яна знікне ці будзе магічнай.