У Славянску жыўцом утапілі двух украінцаў
дапоўнена
23.04.2014 / 09:26
На фота: баевікі ў Славянску вядуць затрыманую ўкраінскую журналістку.
В.а. прэзідэнта Украіны, старшыня Вярхоўнай Рады Аляксандр Турчынаў патрабуе ад сілавікоў аднавіць Антытэрарыстычныя мерапрыемствы.
Пра гэта гаворыцца ў яго заяве, распаўсюджанай у аўторак вечарам.
«Сёння ў Славянску былі знойдзеныя целы двух па-зверску закатаваных людзей. У адным з іх апазналі зніклага дэпутата Горлаўскай гарадской рады, сябра партыі «Бацькаўшчына» Уладзіміра Рыбака, якога выкралі напярэдадні тэрарысты», — нагадаў ён.
«Тэрарысты, ўзялі ў закладнікі фактычна ўвесь Данецкі рэгіён, перайшлі мяжу, пачаўшы катаваць і забіваць патрыётаў Украіны. Яны дзёрзка кінулі выклік не толькі нашай краіне, але і ўсёй сусветнай супольнасці, калі дэманстратыўна паздзекаваліся з рашэнняў, якія былі прынятыя ў Жэневе», — сказаў Турчынаў.
«Гэтыя злачынствы робяцца пры поўнай падтрымцы і папушчальніцтве Расійскай Федэрацыі», — падкрэсліў ён.
«Я патрабую ад сілавых структур аднаўлення і правядзення дзейсных антытэрарыстычных мерапрыемстваў, накіраваных на абарону ад тэрарыстаў украінскіх грамадзян, якія пражываюць на Усходзе Украіны», — заявіў Турчынаў.
Праваахоўнікі кажуць, што абодвух загінулых катавалі, а потым у непрытомным стане, яшчэ жывымі, утапілі, піша «Украінская праўда».
Прэс-служба МУС Украіны пацвердзіла, што дэпутат Горлаўскага гарсавета ад партыі «Бацькаўшчына» Уладзімір Рыбак — адзін з двух загінулых, чые целы знайшлі ў рацэ Тарэц каля пасёлка Райгарадок Данецкай вобласці. Рыбаку ўскрылі жывот, начапілі на спіну заплечнік з пяском і ўтапілі.
Забіты Уладзімір Рыбак.