Расія аштрафавала Google за рэкламу абортаў
Федэральная антыманапольная служба Расіі паведаміла аб штрафе, выпісаным кампаніі Google за рэкламу абортаў са жніўня па верасень 2014 года.
26.01.2015 / 21:26
У названы перыяд праз сэрвіс кантэкстнай рэкламы Google AdWords распаўсюджвалася рэклама абортаў, што супярэчыць не толькі расійскаму заканадаўству, але і правілам самой кампаніі.
За парушэнне Google мусіць выплаціць штраф у памеры 100 тысяч расійскіх рублёў (блізу 1500 даляраў), мінімальна магчымую суму згодна з расійскім законам «Аб рэкламе». Разам з Google на тую жа суму аштрафаваныя два рэкламадаўцы.
Як і рэклама азартных гульняў, рэклама абортаў недапушчальная ў сэрвісах Google, але недабрасумленныя рэкламадаўцы часам «прабіваюцца» праз аўтаматычныя фільтры, сцвярджае кампанія.
Скаргу на нібы наўмысную рэкламу абортаў Google і «Яндэксам» у ФАС накіравала ў кастрычніку 2014 года расійская Ліга бяспечнага інтэрнэту. Тады «Яндэкс» выказваў меркаванне аб тым, што Ліга бяспечнага інтэрнэту пераблытала рэкламу з вынікам пошукавай выдачы.