U Biełarusi napišuć «antyčyrvonuju» knihu škodnych žyvioł i raślin
Pieršaja kniha ź pieralikam niebiaśpiečnych bijałahičnych vidaŭ rychtujecca da vydańnia ŭ 2015-m — pieršaj dekadzie 2016 hoda, paviedamlaje hazieta «Lasnyja naviny».
26.01.2015 / 21:59
Janotapadobny sabaka. Fota Smalenskaha addzialeńnia Ruskaha hieahrafičnaha tavarystva
Z 300 čužarodnych dla Biełarusi raślin u «Čornuju knihu» ŭvajduć 52 najbolš ahresiŭnych vidy. U śpis trapiać i 30 niebiaśpiečnych vidaŭ žyvioł, siarod jakich 7 biespazvanočnych, 3 vidy ryb, amierykanskaja norka i janotapadobny sabaka.
Akramia samich škodnych vidaŭ, u «Čornaj knizie» navukoŭcy nazavuć čas i sposab uźniknieńnia tak zvanych invaziŭnych vidaŭ na Biełarusi, a taksama sposaby baraćby ź imi i ekanamičnuju, ekałahičnuju dy sacyjalnuju škodu ad ich.
«Čornuju knihu» płanujecca pieravydavać raz na 10 hod.
Krytery ŭniasieńnia ŭ padobnyja śpisy dobra prapracavanyja ŭ Jeŭropie, ich źbirajucca pieraniać i biełarusy. Dla ŭniasieńnia ŭ «Čornuju knihu» pryčyny musiać być važkimi, śćviardžaje zahadčyk łabaratoryi hidrabijałohii Navukova-praktyčnaha centru pa bijaresursach Nacyjanalnaj akademii navuk Vital Siamienčanka. Pry akademii dziejničaje centr pa vyvučeńni invaziŭnych vidaŭ, jaki kantraluje areały čužarodnych vidaŭ i fiksuje źjaŭleńnie novych.
Čytajcie taksama: Nie mieła baba kłopatu — zaviała kraba: top-5 pierasialeńniaŭ pradstaŭnikoŭ fłory i faŭny