Viktaryn: Situacyja z pravami čałavieka ŭ Biełarusi dahetul turbuje Jeŭrasajuz
16.05.2016 / 19:55
Situacyja z pravami čałavieka ŭ Biełarusi dahetul turbuje Jeŭrasajuz, zajaviła kiraŭnik pradstaŭnictva JES Andrea Viktaryn, vystupajučy 16 maja na kruhłym stale «Jeŭrapiejskaja palityka susiedstva — čakańni Biełarusi».
«Adnosiny Biełarusi i JES pavinny hruntavacca na ahulnapryznanych kaštoŭnaściach — pavazie da demakratyi, pravoŭ čałavieka i viaršenstva zakona», — skazała Viktaryn, adznačyŭšy, što JES zastajecca prychilnym da palityki «krytyčnaha ŭzajemadziejańnia» ŭ dačynieńni da Biełarusi.
Pavodle słoŭ pradstaŭnika Jeŭrasajuza, za apošnija hady biełaruskija ŭłady zrabili niekalki zachadaŭ, jakija dazvolili palepšyć adnosiny ź JES. Siarod takich zachadaŭ jana nazvała pačatak pieramovaŭ ab spraščeńni vizavaha režymu, adnaŭleńnie dyjałohu ab pravach čałavieka, aktyŭny ŭdzieł krainy va Uschodnim partniorstvie, a taksama namahańni Biełarusi ŭ padtrymańni stabilnaści ŭ rehijonie. Asobna Viktaryn adznačyła vyzvaleńnie palitviaźniaŭ u žniŭni 2015 hoda i praviadzieńnie prezidenckich vybaraŭ biez nasilla. «Ja nie kažu, što nie było niedachopaŭ, ale, na ščaście, ludzi nie apynulisia ŭ turmie», — skazała jana.
Viktaryn taksama padkreśliła, što JES pa-raniejšamu zaklikaje biełaruskija ŭłady adnavić byłych palitviaźniaŭ u hramadzianskich i palityčnych pravach, nie čynić pieraškodaŭ rehistracyi palityčnych partyj i hramadskich abjadnańniaŭ, vykanać rekamiendacyi ABSIE nakont vybaraŭ i ŭvieści maratoryj na śmiarotnaje pakarańnie.
«My spadziavalisia, što chacia b de-fakta budzie maratoryj, ale, na žal, u krasaviku byŭ pakarany čałaviek», — skazała Viktaryn.
Jana taksama adznačyła, što Jeŭrasajuz budzie rabić usio mahčymaje, kab u dyjałohu JES i biełaruskich uładaŭ aktyŭna ŭdzielničała hramadzianskaja supolnaść, a raźvićcio adnosin pamiž Jeŭrasajuzam i aficyjnym Minskam nie pryviadzie da pamianšeńnia padtrymki, u tym liku finansavaj, biełaruskaj hramadzianskaj supolnaści z boku JES.
«Padtrymka hramadzianskaj supolnaści i raźvićcio kantaktaŭ pamiž ludźmi zastajucca našymi asnoŭnymi pryjarytetami», — skazała Viktaryn.