Śledčy kamitet: U «Jeŭropie» ad bienzapiły zahinuła 43-hadovaja žančyna
08.10.2016 / 23:51
Śledčaja hrupa praciahvaje pracavać na miescy zdareńnia ŭ handlovym centry «Novaja Jeŭropa», paviedamlaje pres-słužba Śledčaha kamiteta.
sk.gov.by
Papiarednie ŭstanoŭlena, što 8 kastryčnika kala 17:30 małady čałaviek zajšoŭ u handlovy centr z čachłom dla muzyčnaha instrumienta, ź jakoha dastaŭ bienzapiłu. Ź jaje dapamohaj jon pryčyniŭ cialesnyja paškodžańni 43-hadovaj žančynie, jakaja pamierła na miescy zdareńnia. Zatym, jon dastaŭ siakieru, z dapamohaj jakoj pryčyniŭ cialesnyja paškodžańni jašče adnoj žančynie, joj 46 hadoŭ. Jana špitalizavanaja, akazvajecca nieabchodnaja miedycynskaja dapamoha.
17-hadovy byŭ zatrymany supracoŭnikami milicyi z dapamohaj rabotnikaŭ handlovaha centra. U «Novaj Jeŭropie» užo kanfiskavali zapisy videakamier, a chod rasśledavańnia kryminalnaj spravy uziaty na asabisty kantrol staršynioj Śledčaha kamiteta Ivanam Naskievičam.
U dačynieńni da niepaŭnaletniaha minčuka, jakomu ŭsiaho 17 hadoŭ, raspačata kryminalnaja sprava pa č. 2 art. 139 «Zabojstva, ździejśnienaje pry abciažvajučych abstavinach». Zaraz chłopca dapytvajuć śledčyja, ustaloŭvajecca jaho psichičny stan.