JeS źniaŭ pieraškodu da biaźvizavaha režymu dla Ukrainy i Hruzii
08.12.2016 / 22:11
Jeŭrasajuz nieŭzabavie dazvolić hramadzianam Ukrainy, Hruzii i Kosava pajezdki biez viz, bo ŭdałosia vyrašyć pytańnie ab miechaniźmie prypynieńnia biaźvizavaha režymu, paviedamlaje VVS. Unutranaja sprečka ŭ JeS zastavałasia hałoŭnaj pieraškodaj na šlachu Kijeva i Tbilisi da admieny viz.
ria.ru
Pieramovy z udziełam krain-siabroŭ JeS i Jeŭrapiejskaha parłamienta skončylisia napiaredadni ŭviečary dasiahnieńniem pahadnieńnia. Miechanizm prypynieńnia biaźvizavaha režymu nieabchodny dla nadzvyčajnych situacyj.
Rada JeS vyłučała ŭmovu, kab biaźvizavy režym dla Ukrainy, Hruzii i Kosava pačaŭ dziejničać adnačasova z hetym miechanizmam. Patrabavać prypynieńnia biaźvizavych adnosin moža albo adna z krain JeS, albo Jeŭrakamisija.
Napiaredadni ab dasiahnieńni damoŭlenaściej zajaviŭ prezident Ukrainy Piatro Parašenka. «Abnadziejlivyja naviny z Brusiela pa vynikach maich pastajannych kantaktaŭ z lidarami JeS. Kampramis adnosna miechanizmu prypynieńnia biaźvizu znojdzienyja», — pisaŭ jon u fejsbuku. Uzhadnieńnie miechanizmu prypynieńnia adkryje šlach da dalejšaha hałasavańnia na plenarnym pasiadžeńni Jeŭraparłamienta pa pytańni biaźvizavaha režymu dla Ukrainy, pisała napiaredadni vice-śpikier Viarchoŭnaj rady Iryna Hieraščanka.
Ukraina i Hruzija vykanali ŭsie ŭmovy dla libieralizacyi vizavaha režymu ź JeS, profilny kamitet Jeŭraparłamienta padtrymaŭ rezalucyju pa Ukrainie ŭ vieraśni, adnak kančatkovaje rašeńnie adkładałasia z-za niavyrašanaści hetaha pytańnia.
Parašenka jašče ŭ žniŭni zajaŭlaŭ, što JeS vyrašyć pytańnie ab biaźvizavych pajezdkach praz «ličanyja tydni». Paźniej prezident Ukrainy prahnazavaŭ, što jaho kraina atrymaje biaźvizavy režym z krainami Jeŭrasajuza da kanca listapada, ale pytańnie z miechanizmam prypynieńnia zaciahvała praces.