Партыя Гайдукевіча заклікала да адстаўкі рэгіянальных чыноўнікаў і адмены Дэкрэту №3
19.02.2017 / 16:35
У сувязі з масавымі пратэстамі беларусаў супраць скандальнага падатку з «дармаедаў», Ліберальна-дэмакратычная партыя выступіла з заявай, якая апублікаваная на сайце партыі.
«Сёння ў Гомелі, Гродна, Магілёве людзі выйшлі на мітынгі супраць Дэкрэта Прэзідэнта Рэспублікі Беларусь №3 «Аб папярэджанні сацыяльнага ўтрыманства, — гаворыцца ў паведамленні. — Абурае, што да людзей не выйшаў ні адзін з чыноўнікаў мясцовай улады, у тым ліку, намеснікі па ідэалогіі. Вышэйшы Савет і Цэнтральны камітэт ЛДПБ звяртаецца да кіраўніцтва краіны: 1) Прыпыніць дзеянне Дэкрэта. Стварыць камісію па вывучэнні практыкі яго прымянення. У склад камісіі ўключыць прадстаўнікоў парламенцкіх партый, аўтарытэтных людзей нашай краіны; 2) Вызваліць ад займаных пасадаў чыноўнікаў мясцовых адміністрацый, у тым ліку намеснікаў па ідэалогіі, якія не выйшлі да людзей».
Ліберальна-дэмакратычная партыя шмат гадоў выступала традыцыйным спарынг-партнёрам уладаў на выбарах.