Parašenka papiaredziŭ Biełaruś ab mahčymych «siurpryzach» z boku Rasii

Prezident Ukrainy Piatro Parašenka kanstatavaŭ ŭzmacnieńnie cisku Kramla na ŭładu Biełarusi. Pra heta jon zajaviŭ, vystupajučy ŭ chodzie apieratyŭnych zboraŭ uzbrojenych sił Ukrainy, pieradaje telekanał «112 Ukraina».

22.02.2017 / 14:17

president.gov.by

Parašenka adznačyŭ, što atrymaŭ harantyi ad prezidenta Biełarusi Alaksandra Łukašenki taho, što z boku Biełarusi nie budzie ahresii ŭ adras Ukrainy. Ale, pavodle jaho słoŭ, u dadzieny momant «Kreml uzmacniaje cisk na Biełaruś».

«Upeŭnieny, što prezident Łukašenka nie dazvolić, pra što jon mnie nieadnarazova kazaŭ, vykarystoŭvać svaju terytoryju dla niedružalubnych dziejańniaŭ u adnosinach da nas. Darečy, niadaŭna jon zabaraniŭ vykarystoŭvać fejkavyja papierki jak dakumienty dla padarožžaŭ na terytoryi Biełarusi [vidać, majucca na ŭvazie pašparty DNR i ŁNR]», — padkreśliŭ jon.

Pry hetym Parašenka paraiŭ Biełarusi i Prybałtycy bajacca za svaju biaśpieku.

«Zychodziačy z dośviedu raiŭ by Biełarusi i krainam Bałtyi być hatovymi da lubych siurpryzaŭ z boku Maskvy. Ahresiŭnaja palityka, jakuju viadzie Kreml, nakiravanaja na źmienu hieapalityčnaha łandšaftu ŭsiaho jeŭrapiejskaha kantynienta», - dadaŭ ukrainski prezident.