Сіноптыкі б'юць трывогу: тры тыдні краіна жыве фактычна без дажджу
30.05.2017 / 11:14
Каля трох тыдняў на пераважнай тэрыторыі краіны назіраецца значны недабор ападкаў — колькасць ападкаў адпавядае 10—40% за кліматычную норму для гэтага перыяду.
Дэфіцыт ападкаў прывёў да страты вільгаці, асабліва з верхніх слаёў глебы.
Па апошніх дадзеных візуальных назіранняў верхні 10-сантыметровы пласт глебы на значнай тэрыторыі краіны слаба ўвільготнены, а па дадзеных шэрагу метэастанцый — сухі.
Гэта пагаршае ўмовы для прарастання насення і з'яўлення ўсходаў пазнейшых культур, абцяжарвае правядзенне агратэхнічных мерапрыемстваў. Агароднінным культурам патрабуецца дадатковы паліў.
Добрае ўвільгатненне верхняга пласта глебы адзначаецца пераважна ў паўднёва-ўсходняй частцы Беларусі, дзе ў трэцяй дэкадзе мая прайшлі больш істотныя дажджы.
У найбліжэйшы час з-за лакальнага характару чаканых дажджоў увільгатненне глебы істотна не палепшыцца.