Калектыў музея гісторыі Магілёва патрабуе адстаўкі Лукашэнкі і гатовы аб'явіць страйк
04.09.2020 / 21:17
Музей гісторыі Магілёва патрабуе адстаўкі Аляксандра Лукашэнкі і гатовы аб'явіць страйк. Пра гэта калектыў музея кажа ў адкрытым звароце да беларусаў, органаў выканаўчай і заканадаўчай улады, піша Tut.by.
Фота: Вольга Шукайла, Tut.by
У адкрытым лісце работнікі музея гісторыі Магілёва звяртаюцца да грамадзян, устаноў сферы культуры, органаў заканадаўчай і выканаўчай улады.
Яны выстаўляюць патрабаванні:
- адстаўка Аляксандра Лукашэнкі з пасады прэзідэнта Рэспублікі Беларусь;
- спыненне гвалту і пераследу з боку сілавых структур у адрас мірных грамадзян;
- расследаванне ўсіх выпадкаў гвалту над мірнымі грамадзянамі і прыцягненне да адказнасці ўсіх вінаватых;
- вызваленне ўсіх палітычных вязняў і затрыманых падчас гэтай выбарчай кампаніі і мірных акцый пратэсту грамадзян;
- правядзенне новых, сумленных і празрыстых выбараў з допускам міжнародных і незалежных назіральнікаў і празрыстым падлікам галасоў.
У выпадку невыканання патрабаванняў у дзесяцідзённы тэрмін работнікі скарыстаюцца сваім законным правам на страйк для выражэння занепакоенасці і абароны інтарэсаў.
Пад адкрытым лістом падпісалася у тым ліку кіраўніцтва музея гісторыі Магілёва.
Адкрыты зварот склалі ў жніўні, але публікуецца ён упершыню.