Žonka prapahandysta Rudzia, jakomu spalili mašynu, paśla vybaraŭ zvolniłasia z «SB»
21.09.2020 / 23:46
Raman Rudź — redaktar addzieła rasśledavańniaŭ «Sovietskoj Biełorussii». Na jaho źviartali ŭvahu paśla hučnych chamskich zajaŭ, ale prasłaviŭsia jon paśla taho, jak dniami niechta padpaliŭ jaho mašynu. Rudź pierakanany, što heta adbyłosia praz jaho palityčnyja pohlady: «Za toje, što ja maju hramadzianskuju pazicyju, adroznuju ad ich punktu hledžańnia, spalili maju mašynu».
Čytajcie taksama: Prapahandystu Ramanu Rudziu z «SB» spalili mašynu
Pierad hetym chtości vykłaŭ kantaktnyja Rudzia ŭ telehram-kanale «Karniki Biełarusi». U paviedamleńni ŭdakładniałasia, što jaho žonka Jułija Vasilišyna taksama pracuje ŭ «Sovietskoj Biełorussii».
Jułija Vasilišyna, fota ź jaie fejsbuka
Adnak nasamreč žonka Rudzia była cpiecyjalnym karespandentam haziety tolki da prezidenckich vybaraŭ. Apošniaja navina pad jaje aŭtarstvam była apublikavanaja 14 žniŭnia. Što stała pryčynaj zvalnieńnia?
«Ja abviarhaju sychod pa palityčnych matyvach, jana daŭno chacieła zvolnicca. Jana vučycca, nie chapała na ŭsio času ŭ «SB». Kryŭdna, što jaje ŭklučyli ŭ «Karniki Biełarusi», jana ŭvohule ni pry čym», — zajaviŭ Raman Rudź karespandentu «Našaj Nivy».
Raman Rudź, fota ź jaho fejsbuka
Sama Jułija Vasilišyna kamientavać situacyju admoviłasia. Adnak kali adzin z siabroŭ napisaŭ joj pad paviedamleńniem ab zvalnieńni słovy padtrymki: «Heta — pazicyja. Małajčyna», — Vasilišyna łajknuła jaho mierkavańnie.
U tyja ž dni, 13-14 žniŭnia, byli apublikavanyja apošnija artykuły jašče šerahu reparcioraŭ «Sovietskoj Biełorussii».
Naprykład, žurnalist Kanstancin Bakun paśla vybaraŭ padpisaŭsia pad artykułami «Dziermant ab pratestach: bačnaja ruka prafiesijanałaŭ, jakija žadajuć zadavolić doŭhaterminovy palityčny kryzis u Biełarusi», «Hihin: ludziej paklikali na vulicy, a zatym prosta kinuli» i «Što havorać ekśpierty ab niadzielnych biesparadkach» — i zvolniŭsia.
Dla redaktarki addzieła sacyjalnych prablem «SB» Ludmiły Habasavaj apošnim staŭ asudžalny artykuł «Minčanie vykazalisia pra padziei, jakija adbyvajucca ŭ stalicy i inšych haradach Biełarusi».
Syšła i śpiecyjalnaja karespandentka Volha Pasijak, jakaja pisała pra adukacyju.
Partał Tut.by paviedamlaŭ pra zvalnieńnie čatyroch rabotnikaŭ navinavaha addzieła sajta Sb.by — Śviatłany Hałuza, Alaksandra Kastyki, Vadzima Šundałava i Aliny Jančur.