Пасля выступу Ціханоўскай у Еўрапарламенце ўхвалілі рэкамэндацыі па пераглядзе адносінаў ЕС з Беларуссю
22.09.2020 / 17:32
Перамовы аб прыярытэтах партнёрства ЕС — Беларусь неабходна прыпыніць да таго часу, пакуль у Беларусі не правядуць новыя, свабодныя і справядлівыя прэзідэнцкія выбары, гаворыцца ў рэкамэндацыях па пераглядзе ЕС адносінаў з Беларуссю, якія прыняў камітэт Еўрапарламента па замежных справах, піша «Свабода».
За прыняцце рэкамендацый прагаласавалі 60 чальцоў камітэта, супраць — 7, устрымаўся — 1, паведамляе прэс-служба ЕП. У дакумэнце адзначаецца, што перагляд адносін з Беларуссю неабходна зрабіць з акцэнтам на тым, як Еўрасаюз можа падтрымаць грамадзянскую супольнасць і народ Беларусі.
У рэкамендацыях адзначаецца, што камітэт:
- падтрымлівае рашэнне ЕС і краін-чальцоў не прызнаваць вынікі сфальсіфікаваных прэзідэнцкіх выбараў у Беларусі: «Аляксандр Лукашэнка не будзе з'яўляцца законным прэзідэнтам па заканчэнні тэрміну яго цяперашніх паўнамоцтваў 5 лістапада»,
- падтрымлівае народ Беларусі ў яго законных патрабаваннях новых, свабодных і справядлівых выбараў і настойвае на поўнай адпаведнасці выбарчага працэсу ў Беларусі міжнародным стандартам,
- прызнае Каардынацыйную раду, ініцыяваную Святланай Ціханоўскай, законным прадстаўніком народа, які патрабуе дэмакратычных зменаў і свабоды ў Беларусі,
- патрабуе неадкладнага спынення гвалту, жорсткіх рэпрэсій, катаванняў і ціску на мірных дэманстрантаў, а таксама неадкладнага і безумоўнага вызвалення ўсіх палітычных вязняў, прадстаўнікоў грамадзянскай супольнасці і журналістаў,
- заклікае Еўрасаюз як мага хутчэй увесці санкцыі ў дачыненні да вялікай групы беларускіх службовых асоб, у тым ліку Лукашэнкі.
Рэкамендацыі таксама тычацца пытанняў эканамічнага і галіновага супрацоўніцтва з Беларуссю, кантактаў паміж людзьмі, атамнай энергетыкі.
Цяпер рэкамэндацыі павінны зацвердзіць на сэсіі Еўрапарламента, а потым накіраваць вярхоўнаму прадстаўніку Еўрасаюза па знешняй палітыцы і палітыцы бяспекі Жазэпу Барэлю, у Еўракамісію і ва ўрады краін-сябраў ЕС.