Да велікоднага стала. Запечаная нага ягняці з прыправамі — духмяная страва, якую проста прыгатаваць
Добрае мяса і травы, і нічога больш. Гэтая страва стане цудоўным упрыгожваннем велікоднага стала. І, што не менш прыемна, яе не надта цяжка гатаваць.
13.04.2022 / 16:30
Фота: BBC Food
Каб прыгатаваць запечаную нагу ягняці з прыправамі, вам спатрэбіцца:
- адна нага ягняці вагай 2 кг,
- лісце з маленькага пучка арэгана,
- чайная лыжка лісця размарыну,
- 4 галоўкі часнаку (трэба іх расціснуць),
- цэдра і сок аднаго лімона,
- цэдра і сок аднаго апельсіна,
- 2 сталовыя лыжкі аліўкавага алею,
- 2 чайныя лыжкі марской солі.
- Разагрэйце духоўку да 180 градусаў.
- Пакладзіце ягняціну ў вялікую форму для запякання скурай уверх, і з дапамогай вострага нажа зрабіце на скуры як мага больш надрэзаў.
- З дапамогай блэндэра ці кухоннага камбайна змяшайце арэгана, размарын, часнок, цэдру лімона і апельсіна, па 2 сталовыя лыжкі лімоннага і апельсінавага соку, аліўкавы алей і соль. Размажце гэтую сумесь па ягняціне — трэба добра ўцерці яе ў скуру. Пакіньце мяса пры хатняй тэмпературы на 45 хвілін.
- Налейце ў форму для запякання ваду, якая толькі што закіпела — яна павінна пакрываць дно формы на 0,5 сантыметра. Запякайце мяса 1 гадзіну 40 хвілін, прычым пасля першай гадзіны дадайце ў форму вады, калі яна выпарыцца. Калі мяса пачне прыпякацца, пакрыйце яго фольгай. Перад тым, як скончыцца час запякання, дастаньце мяса з духоўкі і праверце яго на гатоўнасць так, як гэта звычайна робіце: напрыклад, праткніце яго нажом і паглядзіце, ці будзе празрыстым той сок, які будзе выцякаць з яго — бо калі мяса гатовае, сок павінен быць празрыстым. Або праверце з дапамогай спецыяльнага тэрмометра тэмпературу мяса ў цэнтры нагі: у выпадку з цалкам прапечаным мясам тэмпература павінна складаць 71 градус, у выпадку з сярэднепрапечаным — 60 градусаў.
- Калі ягняціна будзе гатовай, дастаньце яе з духоўкі, няшчыльна пакрыйце фольгай і пакіньце мяса на 15-30 хвілін. Потым яго можна будзе наразаць.