Biełaruski film moža trapić na Bierlinski fiestyval
Novy film Alaksandra Kołbyšava «Vaŭki» nie pakažuć na «Listapadzie», kab jon moh trapić u Bierlin.
22.10.2009 / 13:36
Novy film Alaksandra Kołbyšava «Vaŭki» nie pakažuć na «Listapadzie», kab jon moh trapić u Bierlin.
Na ekranie — ściuža i śnieh. Ciomny, strašny ciahnik nabližajecca. Streły i kryki. Ucioki palityčnaha zeka. Achoŭniki z aŭčarkami. Zichotkaje śviatło vohnišča. Ludzi ŭ źledzianiełaj vioscy. Palavańnie na čałavieka. Tvary — z sumnievami i pakutaj. Vybar. Achviara. Vaŭčynaje vyćcio.
Alaksandr Kołbyšaŭ źniaŭ na «Biełaruśfilmie» antytatalitarnuju trahiedyju. Film pastaŭleny pavodle adnajmiennaj apovieści Alaksandra Čakmianiova, napisanaj u 1963 h. Za jaje piśmieńnika ciahali ŭ KHB.
Krytyki paraŭnoŭvajuć «Vaŭkoŭ» ź filmami «Žyćcio cudoŭnaje» i «Śpis Šyndlera».
«Hetuju karcinu my prezientujem na Bierlinski mižnarodny kinafiestyval na pačatku nastupnaha hoda, — kaža dyrektar «Biełaruśfilma» Uładzimir Zamiatalin. — Zhodna z papiarednimi vodhukami kinakrytykaŭ, karcinie pa siłach uziać udzieł u fiestyvali kłasu A. U Bierlin mohuć trapić tolki stužki, jakija nidzie raniej nie demanstravalisia. Tamu na sioletnim «Listapadzie» ŭ Miensku «Vaŭkoŭ» nie pabačać. My ŭžo rychtujem patrebnyja dakumienty dla jaho prezientavańnia ŭ Bierlin».
A.Kołbyšava biełaruskija hledačy viedajuć pieravažna jak aktora. Jon syhraŭ zuchavataha partyzana Štyrkina ŭ «Akupacyi» Kudzinienki, pracavaŭ u Bieraściejskim dramatyčnym teatry.
Ale, akramia taho, Kołbyšaŭ — režysior, vučań Viktara Turava.
«Vaŭki», dzie hebisty palujuć za čałaviekam, pierahukajucca z bykaŭskaj «Abłavaj».
Paśla «Uzychodžańnia» Łarysy Šapićki «Vaŭki» Kołbyšava pretendujuć na rolu novaj sučasnaj kinatrahiedyi, što praciahvaje tradycyi Bykava i Šukšyna. Zrešty, z karciny Šapićki ŭ film Kołbyšava pieravandravaŭ i Uładzimir Haściuchin u svajoj karonnaj roli čałavieka z razdušanym sumleńniem.
Vaŭki
Biełaruśfilm, 2009, kalarovy,103 chv.
Režysior: Alaksandr Kołbyšaŭ.
Roli vykonvajuć: Dźmitry Uljanaŭ, Uładzimir Haściuchin, Andrej Panin, Kola Śpirydonaŭ, Dyjana Zaprudskaja, Tamara Mironava, Darja Muchina, Aksana Lasnaja.
Kampazitar: Aleh Fiedasiejeŭ.
Žanr: Trahiedyja pavodle adnajmiennaj apovieści Alaksandra Čakmianiova.