U Minsk prybyŭ dyrektar Mižnarodnaha biuro pracy Kary Tapijoła
27.10.2009 / 18:05
27 kastryčnika ŭ Minsk z trochdzionnym rabočym vizitam prybyŭ Kary Tapijoła, dyrektar Mižnarodnaha biuro pracy — kirujučaha orhana Mižnarodnaj arhanizacyi pracy (MAP). Jon praviadzie kansultacyi ab vykanańni Biełaruśsiu rekamiendacyj MAP.
Jak paviedamiŭ Tapijoła, hałoŭnaja meta jaho vizitu — «atrymańnie infarmacyi ab situacyi z vykanańniem pravoŭ prafsajuzaŭ u Biełarusi».
Siońnia viečaram kiraŭnik MAP sustreniecca z členami niezaležnych prafsajuzaŭ.
Pra sustrečy z aficyjnymi pradstaŭnikami pakul nieviadoma — prahramu vizitu nie paviedamlajuć ni ŭ Ministerstvie zamiežnych spraŭ, ni ŭ Ministerstvie pracy i sacyjalnaj abarony, jakoje kuryruje pytańni supracoŭnictva ŭrada z prafsajuzami. U pres‑słužbie MZS BiełaPAN tolki paviedamili pra zapłanavanuju sustreču Tapijoły z pradstaŭnikom źniešniepalityčnaha viedamstva, nie nazvaŭšy jaje datu.
U 2003 hodzie Administracyjny saviet MAP pačaŭ rasśledavańnie ab parušeńni pravoŭ prafsajuzaŭ u Biełarusi ŭ suviazi sa skarhaj niezaležnych prafsajuzaŭ.
Pavodle vynikaŭ rasśledavańnia Biełaruś piać razoŭ unosili ŭ śpiecparahraf MAP jak krainu, dzie hruba parušajuć pravy prafsajuzaŭ.
Heta, u svaju čarhu, stała pryčynaj dla vyklučeńnia Biełarusi ŭ červieni 2007 hoda z Hienieralnaj sistemy prefierencyj Jeŭrasajuza. Dla viartańnia prefierencyj urad Biełarusi pavinien vykanać 12 rekamiendacyj MAP, u pryvatnaści: dać niezaležnym prafsajuzam mahčymaść rehistravać piarvičnyja arhanizacyi; dać im prava pracavać naroŭni z aficyjnymi prafsajuzami; spynić pieraśled hramadzian pa prafsajuznaj prynaležnaści; zabiaśpiečyć usim prafsajuznym abjadnańniam prava ŭdziełu ŭ vyrašeńni važnych sacyjalnych prablem krainy.
U studzieni 2009 hoda ŭ Biełarusi znachodziłasia hrupa ekśpiertaŭ Mižnarodnaha biuro pracy na čale z Tapijołam i hienieralnym sakratarom Mižnarodnaj kanfiederacyi prafsajuzaŭ Hajem Rajderam. Jany ŭziali ŭdzieł u sieminary pa vykanańni biełaruskim uradam rekamiendacyj MAP. Ekśpierty taksama brali ŭdzieł u raspracoŭcy płana dziejańniaŭ pa dalejšym vykanańni ŭradam rekamiendacyj MAP.