Стала вядома, за што асудзілі шумілінскага чыноўніка, якога троліла «Рудабельская паказуха»
Раней паведамлялася пра тое, што ў Шуміліне быў аддадзены пад суд Сяргей Дзмітрыевіч Белагалоў — чыноўнік, які перад тым не мог у тэлефоннай размове растлумачыць блогерцы Вользе Павук, чаму ў ягоным раёне банкрутуюць калгасы. Было вядома толькі, што судзілі яго за службовую нядбайнасць, а цяпер праясніліся і дэталі суда.
30.08.2023 / 22:30
Выявілася, што колішняму кіраўніку спраў Шумілінскага райвыканкама паставілі ў віну тое, што адна жанчына ў будынку, які належыць райвыканкаму, правалілася ў падвал і загінула.
Напярэдадні Новага года жанчына ўпала ў тэхнічную адтуліну будынка, які знаходзіўся на балансе выканкама пасля перадачы ад ліквідаванага райспажыўтаварыства. Падвал быў глыбінёй 175 см, а рост самой жанчыны складаў 171 см.
Паколькі падвал быў часткова затоплены ледзяной вадой, а жанчына пры падзенні атрымала пераломы чатырох рабрын і іншыя множныя раны, то яна не змагла самастойна адтуль выбрацца і ўрэшце памерла.
Як аказалася, у будынак можна было лёгка патрапіць, а тэхнічная адтуліна было проста накрытая бляхай.
У выніку ўжо былому чыноўніку вынеслі прысуд у 3 гады «хіміі» з забаронай на 3 гады займаць кіраўнічыя пасады. Акрамя таго, ён мае сплаціць 1200 рублёў аплаты выдаткаў. З райвыканкама ж на карысць дачкі загінулай спаганяюць кампенсацыю маральнай шкоды ў 40 тыс. рублёў.
Чытайце таксама:
За абразу Лукашэнкі будуць судзіць пенсіянерку з Шумілінскага раёна. Праз два тыдні ёй споўніцца 65
На Віцебшчыне з пачатку года судзяць ужо восьмага дэпутата
«Рудабельскую паказуху» прызналі экстрэмісцкім фарміраваннем