Вынеслі прысуд вайскоўцу-кантрактніку, які не вярнуўся на службу з адпачынку
У Мінску на выязным пасяджэнні судзілі салдата-кантрактніка, які пайшоў у адпачынак і не вярнуўся на службу, паведаміла прэс-служба Мінскага гарсуда. Судовае пасяджэнне праходзіла ў Цэнтральным Доме афіцэраў у прысутнасці курсантаў вайсковых факультэтаў сталічных ВНУ.
08.09.2023 / 16:22
На лаве падсудных апынуўся радавы-кантрактнік, які не вярнуўся на службу з адпачынку. Яму інкрымінавалі самавольнае пакіданне часці або месца службы (ч. 3 арт. 445 Крымінальнага кодэкса Беларусі), якое зацягнулася больш чым на месяц.
Вядома, што хлопец заключыў кантракт аб праходжанні службы на час навучання ў вайсковым вучылішчы. Аднак, пайшоўшы ў адпачынак, ён не з'явіўся ў вучылішчы, як павінен быў, 8 студзеня, і заставаўся дома да 5 красавіка.
Падчас суда фігурант цалкам прызнаў віну і выказаў раскаянне, што палічылі змякчальнай акалічнасцю.
За амаль тры месяцы, якія салдат самавольна знаходзіўся дома, яго прысудзілі да 3 гадоў пазбаўлення волі. Але пры гэтым суд даў яму адтэрміноўку выканання пакарання з выпрабавальным тэрмінам на 2 гады. Калі за гэты час фігурант не зробіць больш правапарушэнняў, то ў калонію ён не адправіцца.
Таксама яго абавязалі выплаціць крымінальна-прававую кампенсацыю памерам у 3700 беларускіх рублёў.
Чытайце таксама:
У Магілёўскай вобласці ладзяць маштабныя вайсковыя зборы. Прызываюць вайскоўцаў запасу
Вучэнняў «Захад» сёлета не будзе — цяпер афіцыйна
Адыёзнага былога прэс-сакратара Мінабароны ўзнагародзілі Нацыянальнай літаратурнай прэміяй