Прышчэпку ад кавіду ўнеслі ў спіс прафілактычных прышчэпак
Міністэрства аховы здароўя Беларусі ўнесла змены ў пералік прафілактычных прышчэпак па эпідэмічных паказаннях.
21.10.2023 / 15:04
У яго ўключаны парадак вакцынацыі супраць інфекцыі COVID-19, піша smartpress.by.
Як удакладнілі ў Міністэрстве аховы здароўя, вызначана, што вакцынацыя супраць інфекцыі COVID—19 праводзіцца штогод у верасні—снежні.
Праводзіць яе будуць дзецям ва ўзросце ад 5-17 гадоў з хранічнымі захворваннямі, з імунасупрэсіяй, якія знаходзяцца ва ўстановах з кругласутачным рэжымам знаходжання (гэта школы-інтэрнаты, спецыялізаваныя ліцэі, сувораўскія і кадэцкія вучылішчы).
Вакцынацыі таксама падлягаюць асобы
- ва ўзросце 18 гадоў і старэйшыя з хранічнымі захворваннямі, з імунасупрэсіяй,
- ва ўзросце старэйшыя за 60 гадоў, якія знаходзяцца і працуюць ва ўстановах з кругласутачным рэжымам знаходжання,
- медыцынскія і фармацэўтычныя работнікі,
- цяжарныя жанчыны.
Як растлумачылі ў Міністэрстве аховы здароўя, менавіта гэтым катэгорыям рэкамендуюць абавязкова прышчапіцца. Акрамя таго, вакцынаваць будуць і «іншых асоб пры звароце».
У пачатку года ў Беларусі былі ўнесены змены ў тактыку вакцынацыі супраць COVID-19. Так, калі раней для вакцынацыі прапаноўваліся толькі прэпараты расійскі «Спутнік» і кітайскі «Сінафарм», то цяпер падыходзіць «любая даступная вакцына для прафілактыкі COVID-19, дапушчальная да выкарыстання з улікам узросту і паказанняў».
Эксперты адзначаюць, што каранавірус усё больш набывае рысы сезоннай інфекцыі.
Чытайце таксама:
У гэтай узроставай групе ў Беларусі колькасць хворых на ВРВІ вышэйшая ў два разы
У Мінску пачаўся сезон вакцынацыі ад грыпу і кавіду
«Вірус нікуды не знік». Мінздароўя папярэджвае пра важнасць вакцынацыі супраць грыпу і кавіду