У полацкім банку намалявалі Скарыну
Незвычайныя малюнкі ўбачылі наведнікі пасля рамонту ў аддзяленні №216/2069, якое трапіла ў адмысловую праграму «Беларусбанка» — «Этна-падраздзяленні».
05.11.2023 / 18:43
Фота: pvestnik.by
Ідэя праграмы, якую банк рэалізуе да свайго 100-годдзя, палягае ў тым, каб аформіць некалькі філіялаў у этнаграфічнай стылістыцы з элементамі гістарычнай тэматыкі. Полацкае аддзяленне месціцца на праспекце Францыска Скарыны, і цяпер наведнікі бачаць выяву першадрукара ў інтэр'еры банкаўскай установы.
Таксама на сценах у банку — краявіды старога Полацка і малюнкі ў стылі скарынаўскіх гравюр, якія ілюстравалі выдадзеныя ім кнігі. Аслугоўваюць кліентаў супрацоўніцы ў адзенні з нацыянальным каларытам — у спадніцах і вышываных кашулях. Зрэшты, у аднолькавыя блузкі з вышытымі крыжыкам васількамі апранутыя работніцы ва ўсіх аддзяленнях «Беларусбанка», якія трапілі ў этна-праграму.
Фота: gorod214.by
У Полацку вырашылі зрабіць арыгінальным само адкрыццё аддзялення №216/2069 і запрасілі на яго «жывога Скарыну» — мясцовага літаратара Аляксандра Раткевіча, які піша па-руску і публікуецца пераважна ў расійскіх выданнях. Апрануўшыся ў сярэднявечны строй і ўвасабляючы славутую гістарычную асобу, ён чытаў прысутным свае расійскамоўныя вершы пра Полацк.
Фота: pvestnik.by