Пасланне Пуціна пакажуць у кінатэатрах Масквы і яшчэ 20 гарадоў

Адным з саўладальнікаў гэтых залаў аказаўся член «Каманды Пуціна».

27.02.2024 / 16:22

Фота: Ng Han Guan / AP

Анонсы паказаў паслання Уладзіміра Пуціну Федэральнаму сходу, якое павінна адбыцца 29 лютага, размясцілі на сваіх сайтах кінатэатры з 21 горада. Гэтыя залы звязаны адна з адной агульнымі ўладальнікамі.

Адзін з уласнікаў, як высветліла «Агенцтва», — дэпутат Дзяржсходу Марый Эл ад «Адзінай Расіі», член перадвыбарнай «Каманды Пуціна» Васіль Бачкароў. У гутарцы з «Агенцтвам» ён назваў гэтыя паказы «агульнадзяржаўным мерапрыемствам».

Першым на анонсы прамой лініі ў кінатэатрах звярнула ўвагу выданне «7х7», якое паведаміла, што кінапаказ паслання Пуціна будзе ў Пермі. Пазней «Медуза» ўдакладніла, што паказы пройдуць у кінатэатрах сеткі «Сінема 5» у 17 рэгіёнах Расіі.

Насамрэч, геаграфія паказаў яшчэ шырэйшая. Як высветліла «Агенцтва», паказы пройдуць як мінімум у 21 горадзе, у тым ліку ў Маскве, а таксама Хабараўску, Самары, Чабаксарах.

Кіраўнік аддзела камунікацый «Сінема 5» Арцём Паўлоўскі пацвердзіў, што ў структуру сеткі ўваходзяць і кінатэатры іншых брэндаў. Ён удакладніў, што паказ паслання праводзіцца бясплатна, выключна па ініцыятыве сеткі. На пытанне, ці звязаны ўлады з гэтымі паказамі, піяр-менеджар адказаў адмоўна.

Nashaniva.com