Лукашэнка: Расіі патрэбна такая Беларусь
Лукашэнку сёння ў Маскве спыталі, ці будзе Беларусь уступаць у вайну.
12.04.2024 / 15:33
Фота: Kremlin.ru
Лукашэнка заявіў, што неабходнасці для ўступлення Беларусі ў вайну супраць Украіны няма. Пры гэтым ён адзначыў, што «Беларусь робіць сваю справу», але чым менавіта займаецца, не патлумачыў.
«Такой неабходнасці [уступлення Беларусі ў вайну] няма. І не будзе такой неабходнасці. Я неяк сказаў напярэдадні, што Расіі цяпер патрэбная такая Беларусь — мірная, ціхая, спакойная, якая робіць сваю справу. У дэталях я вам не буду распавядаць, чым мы займаемся і гэтак далей. Я ж не адмаўляюся, што мы «суагрэсары».
Кожны робіць сваю справу. Але я проста кажу: ні я, ні Пуцін (мы ўчора таксама гэтую праблему абмяркоўвалі) не хочам, каб пакутаваў братэрскі нам украінскі народ. Не хочам!»— заявіў Лукашэнка.
Пры гэтым ён заўважыў: вялікай праблемы ў тым, каб паставіць «Іскандэр» і запусціць ракету па Украіне няма. Аднак Лукашэнка асцерагаецца наступстваў, паколькі «паўкраіны знаходзіцца ў радыусе 100 кіламетрах ад Кіева».
Акрамя таго, Лукашэнка заявіў, што ўкраінска-беларуская мяжа занадта моцна ўмацаваная, таму ўступленне Беларусі ў вайну нічога б не дало.
«Дзясяткамі выкідваюць трупы цераз мяжу». Пра што Лукашэнка сёння расказваў Пуціну