Жонкі і маці палітвязняў пратэстуюць у Гаване чацвёрты дзень запар
«Або нас заб’юць на вуліцы, ці нас кінуць у турму, ці вызваляць нашых блізкіх, але мы не спынім акцыю», - кажуць яны.
19.03.2010 / 13:19
Марш «Жанчын у белым» — жонак і маці палітвязняў — працягваецца ў сталіцы Кубы Гаване чацвёрты дзень запар. Удзельнікі акцыі патрабуюць ад уладаў вызваліць з турмаў дысідэнтаў.
Дэманстрацыя прымеркавана да сёмай гадавіны масавых арыштаў, якія адбыліся ў краіне ў 2003 годзе. Тады за кратамі апынуліся 75 апазіцыянераў.
Кажа адна з удзельніц маршу:
«Або нас заб’юць на вуліцы, ці нас кінуць у турму, ці вызваляць нашых блізкіх, але мы не спынім акцыю».
Сярод ініцыятараў маршу «Жанчын у белым» была і маці дысыдэнта Арланда Сапата‑Тамаё, які памёр у турме ў выніку трохмесячнай галадоўкі пратэсту.
Адначасова з «Жанчынамі ў белым» на вуліцы Гаваны выйшлі і жанчыны, якія падтрымліваюць урад. Каб не дапусціць сутыкненняў, вартавыя парадку выставілі паліцэйскі кардон.