Začystka pierad «Słavianskim bazaram»: u Viciebsku zatrymanyja braty Kavalenki

Adnaho abvinavačvajuć u niecenzurnaj łajancy, miescaznachodžańnie druhoha nieviadomaje.

09.07.2010 / 12:27

Viečaram 8 lipienia ŭ Viciebsku byŭ zatrymany aktyvist Kansiervatyŭna-chryścijanskaj partyi — BNF Siarhiej Kavalenka.

Jak paviedamiła jaho maci Lidzija Kavalenka,

Siarhieja zatrymali kala 21.00 pobač ź ich domam supracoŭniki milicyi.
Pavodle słoŭ žančyny, jakaja pry hetym prysutničała, milicyjaniery ničoha nie rastłumačyli. Lidzija Kavalenka nie vyklučaje, što jaje syna mohuć abvinavacić u tym, što jon nibyta niecenzurna łajaŭsia ŭ adras supracoŭnikaŭ pravaachoŭnych orhanaŭ.

Dzie zaraz znachodzicca Siarhiej, pakul nieviadoma. Maci imkniecca vyśvietlić miescaznachodžańnie syna i miarkuje, što, chutčej za ŭsio, jaho źmiaścili ŭ izalatar časovaha ŭtrymańnia.

Žančyna taksama paviedamiła, što

siońnia, 9 lipienia, adbudziecca sud nad druhim jaje synam, Vitalem Kavalenkam.
Jaho abvinavačvajuć u tym, što jon niecenzurna vykazvaŭsia na adras supracoŭnika milicyi.

Takim čynam, ličyć Lidzija Kavalenka, ułady chočuć izalavać jaje synoŭ ad hramadstva na čas praviadzieńnia u Viciebsku fiestyvalu «Słavianski bazar», jaki adkryvajecca siońnia ŭviečary.

Siarhiej Kavalenka z pačatku 2010 hoda nieadnarazova zatrymlivaŭsia milicyjaj za arhanizacyju roznych akcyj. U mai sud Kastryčnickaha rajona Viciebska pryhavaryŭ jaho da troch hadoŭ pazbaŭleńnia voli umoŭna za vyviešvańnie bieł-čyrvona-biełaha ściaha na hałoŭnaj jołcy Viciebska 7 studzienia. Hety ŭčynak byŭ kvalifikavany ŭładami jak «naŭmysnyja dziejańni, jakija hruba parušajuć hramadski paradak i vykazvajuć jaŭnuju niepavahu da hramadstva».