Naviny

---

 Naviny

 

Pačali ź pieramohi

Na chakiejnym čempijanacie śvietu ŭ Pieciarburhu ŭ minułuju niadzielu zbornaja Biełarusi vyjhrała ŭ zbornaj Ukrainy ź likam 7:3, a łatyšy prajhrali švedam 1:3. Takim čynam Biełaruś u hrupie «A» zajmaje pieršaje miesca. Siońnia adbuducca matčy Biełaruś—Łatvija i Švecyja—Ukraina, a 4 traŭnia našy zhulajuć sa švedami, a ŭkraincy z łatyšami.

A.K.

 

Padatkaviki na darohach

Mahiloŭskija padatkaviki ŭzialisia za pryvatnych taksistaŭ: łoviać tych, chto ludziej padvozić, a nie zarehistravany. Padatkaviki ŭ cyvilnym spyniajuć mašyny, a kali kiroŭca advozić ich i biare za pieravoz hrošy, jaho biaruć za ruku i nakładajuć štraf. 25 mašyn užo aryštavali, a štrafy składajuć ad 20 da 50 minimałak. Usiaho ž takim čynam padłavili ŭžo 31 kiroŭcu.

Symon Hłazštejn, Mahiloŭ

 

 

U kožnaj treciaj siamji — mašyna

Pavodle BiełaPANu, u asabistym karystańni hramadzianaŭ krainy znachodzicca 2 003 694 roznych transpartnych srodkaŭ. Bolšaść ź ich — 1 285 297 — lehkavyja aŭtamabili. Aproč taho, biełarusy majuć 49 168 hruzavikoŭ, 11 597 aŭtobusaŭ, 116 824 pryčepaŭ i až 540 808 matacykletaŭ. Siarod mašyn najbolš VAZaŭ — 395 797 adzinak ci 30,8%. Druhaja pa papularnaści marka — «maskvič». Ich 199 774 (15,5%). Treciaja — «falksvahien» (117 273). Dalej pa papularnaści iduć «zaparožac», «aŭdzi», «opel», «ford», «mersedes», «mazda», «BMV», «vołha», «reno», «nisan», «FIAT», «tajota», «pežo», «micubisy», «škoda», «chonda», «sitraen». «Jahuaraŭ» u Biełarusi zarehistravana ŭsiaho 97, «linkolnaŭ» — 43, «kadylakaŭ» — 30, a «inačenci» — usiaho 15. A avaryjaŭ najbolš adbyłosia praz «Žyhuli»: 720 letaś, u jakich zahinuli 196 i paranienyja 817 čałaviek. Na druhim miescy tutaka «falksvahieny», z-za jakich adbylisia 463 DTZ, zahinuli 154 i paranieny 529 čałaviek. Na trecim — «aŭdzi», dalej — «opeli» i «fordy». «Maskvičy» ž mabyć užo tolki ličacca, ale ŭsie stajać stojem.

 

Bolnicy zakryvajucca

U lakarniach Barysava spynili špitalizacyju chvorych. Pavodle hałoŭnaha lekara Barysaŭskaj haradzkoj bolnicy Leanida Čura, heta adbyvajecca z-za adsutnaści srodkaŭ. Amal nie zastałosia pieraviazkavych materyjałaŭ i adnarazavych šprycoŭ. Ludziej biaruć tolki dla taho, kab praaperavać vostryja apendycyty, ciažkija paškodžańni pry niaščasnych zdareńniach i atručvańniach. Astatnim chvorym admaŭlajuć u dapamozie — «nie pamruć, vycierpiać». Nie špitalizujuć navat invalidaŭ druhoje suśvietnaje vajny. Takaja sytuacyja i ŭ inšych miescach krainy. Miž tym, pavodle infarmacyi Ministerstva finansaŭ, na śviatkavańnie Dnia pieramohi vydzielili 440 miljonaŭ denaminavanych rubloŭ (kala 460 tys. dalaraŭ pavodle rynkavaha kursu) — na parady i pjanki. Napyšlivaje śviatkavańnie vyhladaje na hetym tle davoli cynična. Padobna, što niechta małady j mocny raspracoŭvaje pierad vybarami svoj tradycyjny «veteranski» elektarat.

Śviatłana Kurs

 

Parad u Miensku, a treniroŭki ŭ Baranavičach

Hetym tydniem pa čatyry, vielmi nizka nad horadam, nasilisia samaloty-źniščalniki Baranavickaj vajskovaj častki. Rychtujucca letuny da paradu ŭ Miensku 9 traŭnia. Ludzi ž pužajucca, jašče pamiatajučy, jak paru hadoŭ tamu zahinuŭ latun Karvat, pieršy Hieroj Biełarusi, ledź adciahnuŭšy padajučy źniščalnik MIH-29 ad vioski Arabaŭščyna, što pobač z horadam.

 

Chto padpiša na «Našu Nivu»?

Baranavickaja haradzkaja biblijateka ładzić akcyju da Suśvietnaha Dnia knihi — “Padarujcie knižni knihu“. Prymajucca ŭ padarunak staryja, užo pračytanyja j niepatrebnyja knihi ad žycharoŭ horadu. Taksama knižnia šukaje sponsaraŭ, jakija b padpisali jaje na peryjadyčnyja vydańni ci padaravali b kolki hrošaj.

Rusłan Raviaka, Baranavičy

 

Azielanieńnie

Tolki paru dzion pratrymałasia novaja šylda na fasadzie Biełaruskaha ŭniversytetu kultury. Zrabili jaje nie standartnym «čyhunkom», a pryhožaj dy vialikaj, na ŭvieś brylok nad uvachodam, z załacistymi litarami na čyrvonym tle dy taniutkimi biełymi stužkami dla akantoŭki źvierchu j źnizu. Dyk kamuści vielmi nie spadabałasia, što pamiž biełymi stužkami krychu čyrvonaha fonu zastałosia. Kramoła! Zahadali prybrać. I dadać «sapraŭdnaha nacyjanalnaha» koleru. I toj kavałak čyrvonaha zalapili zialonaj stužkaj. Sabluli inciaresy słavianskaha narodu.

Dzianis Nosaŭ

 

Pačyrvanieńnie

Babrujskija ŭłady pa horadzie raskleili plakaty nia prosta «z Dniom Pieramohi», a «z Dniom Pieramohi savieckaha narodu...» Čyrvonymi ściažkami, zusim nie maleńkimi, utykali nia tolki horad, ale j faktyčna zaharadnuju darohu — cieraź Biarezinu da bližejšych viosak. Administracyjna heta jašče ŭ miežach horadu, ale — łuhi, raka j čyrvony ściah na kožnym słupie... A na milicejskim błok-pastu ažno try. A ŭ centry horadu ŭpopierak vulic vyviesili lozunh «Politiku priezidienta Riespubliki Biełaruś odobriajem i poddierživajem». Chto «padtrymlivaje i ŭchvalaje», niezrazumieła, bo ŭvieś Babrujsk zaklejeny j raśpisany zusim inšymi lozunhami.

N.Dz.

 

Traŭka ŭ plašcy

Jak paviedamiŭ BiełaPAN, dniami na pierachodzie «Alaksandraŭka» na biełaruska-ukrainskaj miažy zatrymali «žyhuli», u jakich była znojdziena butla nibyta z 5 litrami aleju. Uvahu pamiežnikaŭ pryciahnuŭ šery koler vadkaści. Pryznali, što zamiest aleju ŭ butli — marychuana.

 

Chvaroby medycyny

U Mastach biudžetnikam stali zatrymlivać zarobak. Asabliva heta adčuli na sabie medyki. Da hetaha dadałasia jašče adna prykraść: hrošy najpierš vypłočvajuć načalstvu, a małodšy medyčny persanał pavinien zaŭsiody čakać. Sanitarki i nianiečki vyrašyli šukać praŭdy. Žančyny datelefanavalisia da abłasnoha zdaroŭadździełu. Haradzienski čynoŭnik vysłuchaŭ skarhi i adkazaŭ tolki na adnu ź ich: žančyny płakali i kazali, što niama čym karmić dziaciej, a jon paabiacaŭ dać miech ułasnaj bulby. Ale na nastupny dzień hrošy zapłacili.

A ŭ susiedniaj Lidzie tymčasam paboleła chvorych na ŚNID. Za apošnija 3 tydni chvaroba znajšła jašče 14 achviaraŭ, i ahulnaja kolkaść infikavanych dasiahnuła 67 čałaviek. Kolkaść chvorych na ŚNID na Haradzienščynie sioleta imkliva raście. Nie spadaje i razhuł prancaŭ. Najbolš chvarejuć na ich u Smarhoniach.

Biełaruskaja Asacyjacyja Resursavych Centraŭ

 

«Łukašenku» źniščać

27 krasavika sudździa Ina Šejko vyniesła papiaredžańnie Dzianisu Jaromienku, jaki pryjšoŭ na «Čarnobylski šlach» z štukaj, jakaja nahadvała milicyjantam Łukašenku. Kampazycyja składałasia z chakiejnaha šlemu, prymacavanaha da ščotki (što imitavała vusy), dźviuch nakryvak ad śmiatany zamiest vačej i nosu ź pienaplastu. Sam aŭtar kazaŭ u sudzie, što heta byŭ «tvorčy kryk dušy». Sudździa ž dała Jaromienku papiaredžańnie, a jahony tvor pastanaviła kanfiskavać i źniščyć. Chto budzie źniščać i dzie, ahienctva BiełaPAN nia piša.