Unikalny rycarski daśpiech ChVI stahodździa vajara Vialikaha Kniastva Litoŭskaha znajšli archieołahi ŭ race Vichry pad Mścisłavam.Pra heta karespandentu BiełTA paviedamiŭ prafiesar, zahadčyk kafiedry archieałohii i śpiecyjalnych histaryčnych dyscyplin Mahiloŭskaha dziaržaŭnaha univiersiteta Ihar Marzaluk.
Na praciahu troch sutak ad 23 da 25 žniŭnia pracavali paźmienna archieołahi i vadałazy z vykarystańniem samaj sučasnaj techniki, kab dastać kaštoŭny artefakt rycarskaj epochi.
Daśpiech zachavaŭsia ŭ vydatnym stanie, a takoha unikalnaha šlema saład amara niama ŭ nivodnym muziei Biełarusi i na postsavieckaj prastory.Ich usiaho zachavałasia paru dziasiatkaŭ u Jeŭropie. Pieršapačatkova vynajdzieny ŭ Italii saład nabyŭ vialikuju papularnaść u Hiermanii, staŭšy ŭ druhoj pałovie XV stahodździa typovym hiermanskim šlemam, charakternaj rysaj hatyčnaha daśpiecha.
Cudoŭna zachavaŭsia i sam stalovy pancyr z paddaśpiešnikam z vałovaj skury i łatunnymi nakładkami, palčatki, padłakotniki ŭ siaredzinie, kalčuha, taksama byli znojdzieny elemienty ilnianoha i skuranoha adzieńnia."Heta śviedčyć ab tym, što daśpiech naležaŭ vielmi zamožnamu čałavieku, jaki, miarkujecca, zahinuŭ u časie rasiejska-litoŭskaj vajny (1500-1503 hadoŭ) pamiž Vialikim Kniastvam Maskoŭskim ŭ sajuzie z Krymskim chanstvam z adnaho boku i Vialikim Kniastvam Litoŭskim, jakoje vystupiła ŭ sajuzie ź Livonskaj kanfiederacyjaj", -- skazaŭ Ihar Marzaluk.
Daśpiech pieradadzieny na restaŭracyju. Płanujecca, što
artefakt vystaviać na ŭsieahulny ahlad u archieałahičnaj ekspazicyi Bychaŭskaha zamka, jakaja razhorniecca ŭ adnoj z adnoŭlenych dvuch viežaŭ padčas praviadzieńnia 1 vieraśnia Dnia biełaruskaha piśmienstva.
Pavodle słoŭ Ihara Marzaluka, miesca, dzie znojdzieny rycarski daśpiech, buduć patrulavać družyńniki i milicyja. Na nastupnym tydni tudy vyjedzie jašče adna archieałahičnaja ekśpiedycyja, kab praciahnuć raźviedku i raskopki. Bo pobač ź miescam, dzie byŭ znojdzieny rycarski daśpiech, vyjaŭlenyja jašče i staražytnyja pasieliščy roznych epoch. Naprykład, archieołahi znajšli staražytny instrumient dla pisańnia ("pisała") pakryty srebram.
«Łukašenka pieršym adčuje katastrofu Pucina» — Śviatłana Aleksijevič u vialikaj hutarcy TOK14
Kamientary