Яго стварыла Школа маладых менеджараў публічнай адміністрацыі SYMPA.
«Кошт урада» — інтэрактыўны партал, на якім сканцэнтравана інфармацыя аб даходах і выдатках беларускага сектара дзяржкіравання.
«Беларуская статыстыка заблытаная і схаваная ў нетрах дзяржаўных сайтаў. На сайце «Кошт урада» мы паспрабавалі прадставіць гэтую інфармацыю ў зразумелым выглядзе з дапамогай інфаграфікі і табліц», — кажа кіраўнік праекта Уладзімір Кавалкін.
На сайце сабраная інфармацыя аб даходах і выдатках дзяржавы з 2009 па 2013 год. На галоўнай старонцы ўсталяваны лічыльнік дзярждоўга і доўга ў пераліку на жыхара.
А з дапамогай лічыльніка «За што мы плацім?» таксама можна даведацца, колькі насамрэч атрымлівае дзяржава. Так аказваецца, што гіпатэтычны беларус, які не п'е і не курыць і «на рукі» атрымлівае 500 даляраў штомесяц, з якіх выдаткоўвае 400 (у тым ліку, напрыклад, 25 даляраў за камунальныя паслугі), у выглядзе тых ці іншых выплатаў аддае за дзяржпаслугі 361 даляр.
«Гэта значыць, што за 8-гадзінны працоўны дзень вы працуеце на сябе 4 гадзіны 16 хвілін і на аплату паслуг дзяржавы 3 гадзіны 44 хвіліны», — паведамляе лічыльнік.
«У нашай маладой сацыяльна-арыентаванай дзяржаве дзяржава атрымлівае амаль 50% даходаў чалавека. Гэта лічба складаецца, у прыватнасці, з пенсійных адлічэнняў і аплаты паслуг ЖКГ, бо, у адрозненне ад многіх капіталістычных краін, беларусы не могуць самастойна выбіраць аператара паслуг ЖКГ ці пенсійны фонд — яны прадастаўляюцца дзяржавай», — кажа Кавалкін.
«Беларуская статыстыка — складаная і пакутуе ад звышагрэгацыі інфармацыі. Пры гэтым статыстычныя дадзеныя збіраюцца ў адэкватным, таблічным выглядзе, а спажыўцам дастаўляюцца незразумела ў якім выглядзе. Напрыклад, у развіццё спорту ўключаны і выдаткі на будаўніцтва ўсялякіх лядовых палацаў. І гэтыя лічбы ніяк не дыферэнцыяваныя. Калі б даведацца, колькі грошай ідзе на палацы, а колькі на сам спорт, думаю, лічбы атрымаліся б шакуючымі», — заўважыў эканаміст Сяргей Чалы, які прысутнічаў на прэзентацыі.
Кавалкін паведаміў, што падобныя сайты працуюць шмат у якіх еўрапейскіх краінах. У Грузіі, напрыклад, грошы на такі праект выдаткавала дзяржава. Цяпер і беларусы змогуць убачыць, у колькі ім абыходзіцца ўрад і нават раздрукаваць квіток з канкрэтнымі лічбамі.
Цяпер чытаюць
Што азначае з’яўленне выхадцаў з Беларусі ў расійскім спецпадраздзяленні для асабліва важных аперацый і тайных забойстваў?19
Каментары