Спіс кандыдатаў на парламенцкія выбары ад «Блока Пятра Парашэнкі» ўзначаліў мэр Кіева, чэмпіён-баксёр Віталь Клічко.
Пра гэта стала вядома на з'ездзе Блока 14 верасня ў Кіеве.
«Украіна сёння, як ніколі, мае патрэбу ў нацыянальным адзінстве і кансалідацыі. Таму я пагадзіўся ўзначаліць аб'яднаны спіс Блока Парашэнкі», — цытуе ягоныя словы «Украінская праўда».
У першую дзясятку ўвойдуць таксама былы міністр унутраных спраў, а пасля палітвязень Юрый Луцэнка, доктарка Вольга Багамолец, віцэ-прэм'ер Уладзімір Гройсман і лідар крымскіх татараў Мустафа Джэмілеў. Акрамя таго, ў версе спіса прысутнічаюць вайсковец Юлій Мамчур, які па-геройску павёў сябе ў часе анексіі Крыма, і пісьменніца Марыя Маціос.
Сенсацыяй стала прысутнасць у спісе вядучых украінскіх незалежных журналістаў Мустафы Наема і Сяргея Лешчанкі, а таксама заснавальніцы руху за празрыстасць выбараў «Чэсна» актывісткі Святланы Залішчук.
Каардынатар Блока Юрый Луцэнка заявіў, што яны гатовы ўзгадняць кандыдатаў па мажарытарных акругах з палітычна блізкімі сіламі.
Каментары