Першыя два тыдні бясплатна: у Беларусі з'явілася першая экспрэс-зарадка для электрамабіляў
Сёння ў Беларусі з'явілася першая экспрэс-зарадка для электрамабіляў.
Станцыю стандарту CHAdeMO, што сумяшчаецца з бюджэтнымі электрамабілямі масавай вытворчасці, адкрыла кампанія «А-100».
Станцыя зарадкі магутнасцю 50 кВт дазваляе зарадзіць батарэю электрамабіля да 80% прыкладна за 30 хвілін. А вось каб зарадзіць, напрыклад, электрамабіль Tesla Model S, уладальнік мусіць мець перахаднік.
Першую экспрэс-зарадку размясцілі за гіпермаркетам «Гіпа» ў Бараўлянах, побач з заправачнай станцыяй «А-100» (в. Бараўляны, 7). Гэтае месца было выбрана з разлікам на тое, што аўтамабіль будзе падзараджацца, пакуль уладальнікі аўто робяць пакупкі.
Пакуль гэта адзіная такая зарадка ў Беларусі. Генеральная дырэктарка кампаніі «А-100» Ірына Валадзько паведаміла, што ў сувязі з малой колькасцю аўтамабіляў з электрычнымі рухавікамі, зарадка поўнасцю задаволіць попыт на запраўку электраэнергіяй. Аднак Валадзько адзначыла, што калі электрамабіляў стане больш, будуць адкрытыя і новыя станцыі падзарадкі.
Першыя два тыдні станцыя зарадкі будзе працаваць у тэставым рэжыме і ў гэтыя дні свой электрамабіль можна будзе падзарадзіць абсалютна бясплатна. Але супрацоўнікі «А-100» сказалі, што і пасля заканчэння тэставага тэрміну цана зарадкі будзе нізкай.
Каментары