У Беларусі ў гэтым эпідсезоне чакаецца цыркуляцыя двух новых варыянтаў віруса грыпу. Аб гэтым сёння паведаміла журналістам загадчыца эпідэміялагічнага аддзялення Мінскага гарадскога цэнтра гігіены і эпідэміялогіі Ірына Глінская.
«У бягучым эпідсезоне чакаем, што ў Беларусі будуць цыркуляваць два варыянты віруса грыпу, з якімі мы яшчэ не сутыкаліся. У сувязі з гэтым састаў вакцын змяніўся. Таму ў бягучым годзе асабліва мэтазгодна сфарміраваць абарону супраць захворвання з дапамогай прышчэпкі», — сказала Ірына Глінская.
Паводле яе слоў, у першую чаргу зрабіць прышчэпку ад грыпу неабходна людзям, якія ўваходзяць у групу рызыкі. «Засцерагчы сябе ад захворвання павінны асобы старэйшыя за 65 гадоў. Дарэчы, у мінулым годзе прышчэпку зрабілі амаль 60 працэнтаў пажылых людзей. Трэба таксама помніць аб тым каласальным эфекце, які мы атрымліваем, робячы прышчэпку цяжарнай жанчыне. Бо дзіця, народжанае ў прышчэпленай ад грыпу маці, першыя шэсць месяцаў абаронена ад хваробы», — падкрэсліла спецыяліст.
Загадчыца эпідэміялагічнага аддзялення адзначыла, што ў першую чаргу вакцынаваць трэба і дзяцей, нагадаўшы, што больш за 90 працэнтаў шпіталізаваных з-за грыпу і вострых рэспіраторных інфекцый —непаўналетнія. Засцерагчы сябе супраць грыпу спецыялісты таксама рэкамендуюць працуючаму насельніцтву. «Мы не першы год атрымліваем доказ, што вакцынацыя супраць грыпу на прадпрыемствах у 3-5 разоў зніжае захваральнасць сярод работнікаў», — сказала Ірына Глінская.
У бягучым годзе прышчапіць ад захворвання за кошт бюджэтных крыніц фінансавання плануецца каля 780 тыс. (амаль 40 працэнтаў) жыхароў Мінска. Бясплатна прэпарат атрымаюць людзі з высокай рызыкай развіцця цяжкіх постгрыпозных ускладненняў (хранічнымі захворваннямі сардэчна-сасудзістай, дыхальнай і эндакрыннай сістэм, асобы старэйшыя за 65 гадоў і іншыя), а таксама грамадзяне, якія маюць высокую рызыку захворвання на грып (дзеці, медыцынскія работнікі, супрацоўнікі МНС, МУС і іншыя).
За кошт рэспубліканскага і мясцовага бюджэтаў у Мінску прышчэпліваюць вакцынай кітайскай вытворчасці «Флюваксін». Яна выкарыстоўваецца ў рэспубліцы на працягу чатырох гадоў і даказала сваю эфектыўнасць і бяспеку. Прышчэпку супраць захворвання на платнай аснове можна зрабіць і іншымі вакцынамі, дазволенымі да прымянення ў Беларусі, у тым ліку «Грыпол плюс» (Расія), «Ваксігрып» (Францыя), «Флюарыкс» (Бельгія), «Інфлювак» (Нідэрланды). Кошт платнай прышчэпкі вар'іруецца ад Br65 тыс. да Br150 тыс.
Цяпер чытаюць
Бабарыка тры хвіліны адказваў на пытанне, чый Крым. Так і не адказаў97
Каментары