Украінская нявеста арыштаванага Змітра Палойкі: Для мяне гэта шок, я яго больш нікуды не адпушчу
Жыхара г. Баранавічы Змітра Палойку затрымалі на вакзале па прыездзе з Украіны 4 снежня і асудзілі на 10 сутак за дробнае хуліганства. Як мяркуецца, хлопец служыў у батальёне «Данбас» і таму быў затрыманы ў Беларусі.
Intex-press звязалася з нявестай Змітра — Вітай, якая жыве ва Украіне ў горадзе Курахава Данецкай вобласці. Яны пазнаёміліся летам праз інтэрнэт, ён некалькі разоў прыязджаў да яе ва Украіну, і цяпер Віта са Змітром вырашылі ажаніцца.
Жанчына распавяла, што Дзмітрый паехаў у Баранавічы, каб прадаць кватэру.
— Мы збіраемся ажаніцца, і ён хацеў мець нейкія сродкі для таго, каб пачаць жыць ва Украіне, — тлумачыць Віта. — Ва Украіне цяпер ідзе вайна, усім цяжка, і Зміцер лічыў, што лішнія грошы нам не перашкодзяць. Ён знайшоў пакупніка, дамовіўся пра цану і паехаў у Баранавічы афармляць дакументы.
Па прыездзе ў Баранавічы 8 снежня Змітра Палойку затрымалі адразу на вакзале. Ён паспеў патэлефанаваць Віце і сказаць, што яго забіраюць у міліцыю.
«Паведамі ўсім, што ў Беларусі жаніцца з украінкамі забаронена», — апошняе, што пачула Віта ад Змітра.
— У нас вайна ідзе, а такога бязладдзя няма, — уздыхае жанчына.
Пазней Віце патэлефанаваў чалавек, які сядзеў разам са Змітром у СІЗА, і распавёў, што міліцыя пасля затрымання перадала хлопца КДБ, а тыя ў хуткім часе вярнулі яго назад міліцыі. Суд прысудзіў Змітра Палойку да 10 сутак арышту за дробнае хуліганства.
У КДБ паведамілі, што нічога не могуць сказаць аб затрыманні Палойкі.
Беларускія выданні выказалі здагадку, што чалавек па прозвішчы Палойка служыў у батальёне «Данецк» і, мабыць, таму хлопец быў затрыманы ў Беларусі.
Віта гэтаму здзіўленая, яна лічыць, «магчыма, Зміцер выпадкова трапіў у кадр». Па словах жанчыны, горад Курахава, дзе яна жыве, знаходзіцца за 18 км ад зоны АТА і за 30 км ад данецкага аэрапорта. Віта распавяла, што кананада ў горадзе чутная амаль кожны дзень, бывае, і шкло ад выбухаў рассыпаецца: «Грады ляцяць над галовамі, але мы ўжо ўсе прывыклі».
— У нас у горадзе вельмі шмат вайскоўцаў: «Данбас», «Азоў», «Правыя сектары» розныя, тэхніка ездзіць, — распавядае нявеста Палойкі. — Дарослыя і дзеці пастаянна фатаграфуюцца з імі. Можа, ён дзесьці выпадкова ў кадр трапіў?
Па словах Віты, Зміцер пражыў у яе ва Украіне тры месяцы, пасля вярнуўся ў Беларусь. І толькі нядаўна зноў прыязджаў на адну тыдзень у Курахава. Гэта можна праверыць і па штампах у пашпарце.
— Ён 20 снежня павінен выйсці, і хай адразу едзе дадому ва Украіну, — ледзь не плача Віта. — Не трэба мне ні яго кватэра, ні тыя грошы. Мы хочам нармальную сям'ю стварыць, працаваць, жыць душа ў душу. Ён добры зваршчык, у нас у горадзе ёсць дзе працаваць — ёсць ГРЭС, завод «Электрасталь»… Я не разумею, як такое ў вашай краіне магло адбыцца? Для мяне гэта шок. Я яго больш нікуды не адпушчу.
Каментары