Адразу на некалькі мячэцей адбыліся напады ў некалькіх гарадах Францыі на наступны дзень пасля тэракта ў рэдакцыі часопіса Charlie Hebdo, арганізацыю якога прыпісваюць радыкальным ісламістам. Абставіны ўчынення гэтых актаў гвалту і магчымая сувязь паміж імі пакуль не выяўленыя.
Напад на мячэць адбыўся ў горадзе Пор-ла-Нувель у дэпартаменце Од на міжземнаморскім узбярэжжы. Стала вядома, што злачынцы абстралялі з пісталета малітоўную залу вечарам 7 студзеня прыкладна праз гадзіну пасля вячэрняй малітвы. На той момант памяшканне ўжо пуставала, пацярпелых няма.
Як паведаміла газета Ouest-France, раніцай 8 студзеня некалькі гранат было кінута невядомымі ў двор мячэці Саблон у горадзе Ле-Ман. Разарвалася толькі адна з іх. Ніхто пры гэтым не пацярпеў. Раён вакол культавага збудавання ачэплены паліцыяй.
8 студзеня таксама паступілі паведамленні аб выбуху ў горадзе Вільфранш-сюр-Сон на ўсходзе Францыі. Інцыдэнт адбыўся ў рэстаране, размешчаным у непасрэднай блізкасці ад мясцовай мячэці. Інфармацыі аб пацярпелых няма, таксама як пакуль не зразумела і прычына выбуху. Вядзецца расследаванне, паліцыя гаворыць аб крымінальным следзе.
Яшчэ адно здарэнне адбылося раніцай 8 студзеня ў Манружы каля французскай сталіцы. Там быў абстраляны паліцэйскі патруль. Двое паліцэйскіх параненыя, адна супрацоўніца паліцыі пазней памерла. Пакуль удалося затрымаць толькі аднаго ўдзельніка інцыдэнту — 52-гадовага мужчыну. Злачынец, які адкрыў па патрулі агонь з аўтаматычнай зброі, уцёк з месца злачынства. Цяпер яго шукаюць улады.
Прадстаўнікі ўлад пакуль не змаглі ўдакладніць, ці існуе сувязь паміж гэтым інцыдэнтам і тэрактам у рэдакцыі парыжскага штотыднёвіка Charlie Hebdo.
Цяпер чытаюць
Святлана Ціханоўская завяла трэдс. Што ёй пішуць беларусы?2
Каментары