Снежаньская пастанова ўрада № 1207, якая фактычна замарозіла цэны на спажывецкім рынку Беларусі, можа быць адменена ў другім квартале гэтага года.
Пра гэта паведаміла 19 лютага падчас заключнага выступлення на пасяджэнні Рэспубліканскага клуба дырэктараў Жанна Тарасевіч, сустаршыня праўлення Бізнес-саюза прадпрымальнікаў і наймальнікаў імя Куняўскага.
Яна адзначыла, што пытанне пра адмену цэнавага кантролю ўзнімалася 13 лютага падчас калегіі Міністэрства гандлю.
«Было заяўлена, што чакаецца практычна адмена пастановы № 1207 і Міністэрства эканомікі ўнясе адпаведныя прапановы», — паведаміла Тарасевіч, удакладніўшы, што рашэнне пра адмену мараторыя на рост цэн плануецца падрыхтаваць у другім квартале гэтага года.
Нагадаем, у снежні 2014 года на фоне росту курсу долара ў краіне ўрад прыняў пастанову № 1207, якая ўстанавіла фактычную забарону на павышэнне цэн на спажывецкім рынку.
У сярэдзіне студзеня дзяржорганы выступілі з растлумачэннямі і паведамілі, што павышаць цэны на імпартны тавар можна на велічыню змены курсу долара. Аднак гэтае рашэнне распаўсюджваецца цяпер толькі на той імпартны тавар, які быў пастаўлены ў Беларусь пасля 18 снежня.
Міністэрствы гандлю і эканомікі 19 лютага выступілі з новымі растлумачэннямі да пастановы № 1207 і прывялі новыя рэкамендацыі, у выпадку выканання якіх да прадпрыемстваў не будуць прымяняцца меры адказнасці, прадугледжаныя снежаньскай пастановай.
У прыватнасці, згодна з растлумачэннямі дзяржорганаў, з 20 лютага вытворцы могуць павышаць адпускныя цэны (тарыфы) на велічыню змены кошту сыравіны і матэрыялаў, камплектуючых, тары і ўпакоўкі, якія паступілі пасля 18 снежня 2014 года.
Да 20 лютага павялічваць цэны на сыравіну і матэрыялы, камплектуючыя, тару і ўпакоўку айчыннага паходжання, а таксама на тыя, якія паходзяць з краін Еўразійскага эканамічнага саюза, не дапускалася.
Паводле меркавання экспертаў, рашэнне дзяржорганаў, прынятае 19 лютага, з`яўляецца мерай па аслабленні цэнавага кантролю, устаноўленага два месяцы таму пастановай № 1207.
Варта адзначыць, што раней бізнес-саюзы неаднаразова звярталіся ва ўрад і настойвалі на адмене пастановы № 1207. Неабходнасць адмены цэнавага кантролю яны тлумачылі негатыўным уплывам гэтага рашэння на прадпрыемствы.
Паводле меркавання бізнес-супольнасці, цэнавы кантроль прыводзіць да стратнай дзейнасці многіх прадпрыемстваў, што пасля можа справакаваць «лавінападобны рост неплацяжоў», скарачэнне вытворчасці і зніжэнне заработнай платы.
Цяпер чытаюць
ЗША паведамілі, што вызваленне палітвязняў у Беларусі «адкладзенае на некаторы час»21
Каментары