Гонкі адкоцяцца да піку сваёй папулярнасці.
Кампанія Electronic Arts анансавала выпуск чарговай відэагульні серыі Need for Speed. Новая частка стане перазапускам серыі ды вяртаннем да тэматыкі стрытрэйсінгу, папулярызаванай Need for Speed: Underground, піша Eurogamer.
Як і ў класічным Underground 2, гонкі будуць праходзіць у адкрытым свеце начнога мегаполіса на стрытрэйсінгавых аўто, якія гульцам дазволяць мадыфікаваць да найдрабнейшых дэталей. Назва новай гульні — проста Need for Speed, без падзагалоўкаў.
Новай гульні абяцаюць і захапляльны сюжэт.
Славутая серыя Need for Speed не была аднародна папулярнай, з 1994 года перажывала ўзлёты і падзенні. Need for Speed: Underground 2003 года і Underground 2 2004-га былі хіба не самымі паспяховымі гульнямі. Таму паспрыяла і папулярнасць фільмаў «Фарсаж» — яны разам з Need for Speed паспрыялі з’яўленню шматлікіх мадыфікаваных і расфарбаваных аўто на вуліцах рэальных гарадоў.
А вось апошняя ў серыі на сёння, Need for Speed: Rivals 2013-га году, была практычна правальнай. Папярэднія гульні таксама не маглі пахваліцца асаблівай папулярнасцю — пасля Underground 2 распрацоўшчыкі сыходзілі ўсё далей ад вулічных гонак ды прасунутага цюнінгу аўто.
Распрацоўкай новай Need for Speed зоймецца кампанія Ghost Games — тая самая, што распрацавала Rivals. Вялікі анонс гульні пройдзе 15 чэрвеня. Гульня мае выйсці ўвосень для Windows, Xbox One і Playstation 4.
Цяпер чытаюць
Што людзі кажуць аб праездзе праз «Брузгі» і «Бераставіцу» і чаму ў апошняй стаяць па 12 гадзін2
Што людзі кажуць аб праездзе праз «Брузгі» і «Бераставіцу» і чаму ў апошняй стаяць па 12 гадзін
«Наіўна спадзяваліся зарабляць у Еўропах, прыязджаць дадому лячыць зубы на халяву і здаваць кватэру». Прапаганда пачала апраўдваць дарагія жыроўкі для «дармаедаў»1313
Каментары