Стымуляцыя электрычным токам дапамагла здаровым і хворым на шызафрэнію
Але некаторыя навукоўцы спішуць гэта на эфект плацэба.
Даследчыкі Універсітэта Джона Хопкінса, ЗША, прадэманстравалі пазітыўны эфект мікрапалярызацыі — стымуляцыі мозгу пастаянным токам. Аб выніках даследавання, прадстаўленага ў часопісе Clinical Schizophrenia and Related Psychoses, распавядае N+1.
Уздзеянне на мозг электрычным токам палепшыла вынікі тэстаў здольнасцей розуму як пяці хворых на шызафрэнію, так і кантрольнай групы з шасці іх родзічаў.
У прыватнасці, палепшыліся кароткачасовая вербальная і візуальная рабочая памяць, што пагаршаюцца ў хворых на шызафрэнію.
Кожны з паддоследных праходзіў два паўгадзінных сеансы: у катодным рэжыме паніжалася актыўнасць пэўнага ўчастку галаўнога мозгу, затым у анодным — стымулявалася. Уздзеянне было накіраванае на частку лобнай кары, што лічыцца адказнай за кароткачасовую памяць.
Прыхільнікі мікрапалярызацыі сцвярджаюць, што яна паляпшае ўвагу, памяць, вегетатыўныя і іншыя функцыі: катодны ток супакойвае, а анодная дэпалярызуе нейроны і прыводзіць іх да большай гатоўнасці адказваць на сігналы іншых нервовых клетак.
Праціўнікі кажуць, што толькі ў адной з мноства ранейшых работ былі выяўленыя відавочныя змены ў мозгу, у астатніх паляпшэнне памяці ці крэатыўнасці можна спісаць на эфект плацэба — пацыенту стала лепей, бо ён паверыў, што яму стане лепей.
Даследаванні ўплыву электрычнага току на нервовую тканку і мозг вядуцца з сярэдзіны XIX стагоддзя. Шырокаму выкарыстанню такой тэрапіі замінае складанасць уліку эфекту ад лекавання і вялікі роскід вынікаў пры выкарыстанні розных прыбораў. На сёння навукоўцы праводзяць эксперымент на большай выбарцы пацыентаў і з рэгулярных сеансаў хочуць вызначыць доўгачасовыя эфекты ўздзеяння электрычнасці на мозг.
Каментары