Крывавай бойні не будзе.
Пісьменнік Джордж Р. Р. Марцін, аўтар цыклу раманаў «Песня лёду і полымя», паводле якога здымаецца серыял «Гульня тронаў», распавёў The Observer пра сваё бачанне завяршэння цыклу.
Марцін яшчэ не дапісаў апошнюю кнігу «Песні лёду і полымя», ён не ведае, як дакладна складуцца абставіны. Але хоча стварыць «горка-салодкі» фінал у традыцыях Толкіена.
Журналіст спытаў Марціна пра завяршэнне серыі: маўляў, галоўнае, што ў яго пытаюць, ці скончыцца серыя страшэнным апакаліпсісам.
«Гэта дакладна не мой падыход, — адказаў Марцін, якога журналіст назваў «рэвізіяністам фэнтэзі». — Я казаў раней, што тон развязкі, да якога я імкнуся, будзе горка-салодкім. У сэнсе, не сакрэт, што на мяне вялікі ўплыў меў Толкіен, і што мне падабаецца, як скончыўся «Уладар Пярсцёнкаў». Ён сканчаецца перамогай, але гэта горкая перамога».
Пісьменнік адзначае, што ў канцы гісторыі Фрода ніколі не стане такім, як быў раней, ён вымушаны сысці ў Несмяротныя землі, тым часам астатнія застануцца жыць звычайным жыццём.
«[Глава «Уладара Пярсцёнкаў»] «Апаганеная Хабітанія» — выдатны твор, які я не разумеў, калі мне было 13. Чаму гэта тут? Што, гісторыя скончылася? Але штораз, як я потым чытаў яе, я асэнсоўваў дасканаласць гэтай часткі больш і больш, — прыгадвае Марцін. — Усё, што я магу сказаць, што гэта той тон, да якога я імкнуся. Атрымаецца ў мяне ці не, гэта ацэняць людзі як вы і мае чытачы».
Акрамя таго, пісьменнік назваў нашы дні «залатым векам» тэлебачання, калі журналіст згадаў серыялы «Вар’яты», «Ва ўсе цяжкія» і «Падпольная імперыя» у адказ на пытанне Марціна, што журналіст будзе рабіць, калі скончыцца «Гульня тронаў».
***
На сёння Марцін скончвае работу над шостай кнігай «Песні…», «Вятры зімы», што мае стаць перадапошняй у цыкле. Апошняя меркавана будзе мець назву «Мары пра вясну». Даты выхаду невядомыя. Кнігі асноўнага цыклу часцей за ўсё выходзілі з вялікімі перапынкамі: у 1996, 1999, 2000, 2005, 2011 гадах. Між імі выходзілі спін-офы і прыквэлы пад рэдакцыяй Марціна.
Тэлесерыял мае завершыцца праз тры сезоны, але па яго завяршэнні даволі імаверныя здымкі прыквэла.
Глядзіце таксама: 7 серыялаў, што варта паглядзець гэтым летам
Каментары