Літва накіравала Беларусі чарговую ноту, у якой запытвае вынікі расследавання нядаўняга інцыдэнту на АЭС, якая будуецца, паведамляецца на сайце літоўскага МЗС.
28 ліпеня ў міністэрства была выкліканая часовая павераная ў справах Беларусі ў Літве Людміла Татарыновіч. Ёй уручылі ноту і папрасілі «як мага хутчэй падаць падрабязную інфармацыю аб трэцім інцыдэнце, што, як мяркуецца, адбыўся пры будаўніцтве Астравецкай атамнай электрастанцыі».
Дыпламатычныя меры, адзначылі ў МЗС Літвы, былі прынятыя пасля таго, як беларуская прэса апублікавала інфармацыю пра інцыдэнт, які здарыўся 10 ліпеня на Беларускай АЭС і падчас якога, верагодна, быў пашкоджаны корпус атамнага рэактара. «Гэты інцыдэнт разглядаецца Літвой як асабліва небяспечны і здольны выклікаць незваротныя адмоўныя наступствы для бяспекі АЭС, што будуецца», — гаворыцца ў паведамленні.
Акрамя таго, у ноце Літва прапануе Беларусі заснаваць міжнародную камісію экспертаў для аналізу вынікаў гэтага расследавання і давання рэкамендацый, а таксама выказвае занепакоенасць адносна празрыстасці праекта БелАЭС, недахопу культуры бяспекі і неадпаведнасці міжнародным стандартам па атамнай бяспецы і ахове навакольнага асяроддзя, недастатковай ролі рэгулятара ядзернай бяспекі Беларусі і генеральнага падрадчыка будаўніцтва пры арганізацыі бяспекі будаўнічых работ.
«Беларусь яшчэ раз закліканая запрасіць незалежных міжнародных экспертаў у мэтах ацэнкі прыдатнасці пляцоўкі Астравецкай АЭС, будаўнічых работ і іх якасці», — паведамляюць у знешнепалітычным ведамстве суседняй дзяржавы.
Акрамя таго, паведамляецца, што міністры замежных спраў, энергетыкі і навакольнага асяроддзя Літвы накіравалі ліст намесніку старшыні Еўракамісіі Марашу Шафчовічу і камісару па энергетыцы Арыясу Каньетэ, у якім праінфармавалі пра інцыдэнт і папрасілі актыўнага ўмяшання ЕС у вырашэнне пытання ядзернай бяспекі, важнага для ўсяго рэгіёна.
Міністр замежных спраў Літвы Лінас Лінкявічус таксама звярнуўся з лістом да генеральнага сакратара МАГАТЭ Юкія Амана, у якім падкрэсліў важную ролю гэтай арганізацыі ў захаванні ядзернай бяспекі падчас ажыццяўлення Беларуссю праекта АЭС, а таксама папрасіў агенцтва ўдзельнічаць у расследаванні інцыдэнтаў.
Цяпер чытаюць
«Спасибо, Лена! Продолжайте вести наблюдение». Афіцэр, які пісаў Харысавай, пасвіўся ў чатах палітэміграцыі, а некаторым дзяўчатам нават прапаноўваў абмяняцца нюдсамі83
Каментары