Пракурор Максім Чупрыс просіць суд прыгаварыць былога футбольнага функцыянера Андрэя Жукава да пяці гадоў пазбаўлення волі ў калоніі ўзмоцненага рэжыму з канфіскацыяй маёмасці, забаронай займаць пасады, звязаныя з выкананнем арганізацыйна-распарадчых абавязкаў і юрыдычна значных дзеянняў, тэрмінам на пяць гадоў і штрафам у памеры 500 базавых велічынь.
Выступаючы 30 снежня ў спрэчках у судзе Цэнтральнага раёна Мінска, прадстаўнік дзяржабвінавачання выказаў упэўненасць у тым, што віна Жукава даказаная.
Былы дырэктар дэпартамента судзейства і інспектавання асацыяцыі «Беларуская федэрацыя футбола», старшыня камісіі прызначэнняў федэрацыі абвінавачваецца па шасці эпізодах атрымання хабару (ч. 1 і 2 арт. 430 КК) ад арбітраў і трэнера ў сезоне-2014/2015 і 2015/2016 за прызначэнне на канкрэтныя матчы вышэйшай і першай лігі Кубка Беларусі па футболе канкрэтных суддзяў і ў перавышэнні ўлады (ч. 2 арт. 426 КК). Віну ва ўчыненні гэтых злачынстваў Жукаў прызнаў цалкам, аднак ад дачы паказанняў у судзе адмовіўся.
Даказанасць віны Жукава Чупрыс абгрунтаваў тым, што сам абвінавачваны згодны, што ўчыняў інкрымінаваныя яму дзеянні і напісаў яўку з павіннай. Акрамя таго, пракурор адзначыў паказанні на папярэднім следстве і ў судзе арбітраў і трэнера, якія перадавалі функцыянеру грошы, іх заявы аб прыцягненні Жукава да крымінальнай адказнасці.
Той факт, што адзін з іх у судзе адмовіўся ад дадзеных на следстве паказанняў і сказаў, што заява была ім напісана пад націскам, пракурор патлумачыў імкненнем сведкі абяліць сябе, усведамляючы, што ён таксама ўчыніў злачынства — даў хабар.
Першы злачынны эпізод адносіцца да 4 кастрычніка 2014 года, апошні — 7 чэрвеня 2016-га. У абвінавачанні фігуруюць сумы ў 100 і 200 долараў, 100 еўра, 50 дэнамінаваных рублёў і бутэлька каньяку «Арарат».
Кажучы пра перавышэнне Жукавым паўнамоцтваў, пракурор звярнуў увагу суда на тое, што ўдзел членаў камісіі прызначэнняў федэрацыі ў прызначэнні арбітраў быў фармальным. Жукоў, паводле яго слоў, ажыццяўляў расстаноўку судзейскага складу аднаасобна, насуперак усім інструкцыям, прычым з карыслівай зацікаўленасці.
Па просьбе абароны да матэрыялаў справы далучана хадайніцтва федэрацыі футбола аб максімальнай паблажцы да Жукава, які ўжо пакараны па лініі АБФФ — ён абвешчаны персонай нон грата ў футболе. Федэрацыя папрасіла суд прызначыць Жукаву пакаранне ніжэйшае за найніжэйшую мяжу, не звязанае з пазбаўленнем волі, а калі гэта немагчыма — мінімальнае пакаранне, прадугледжанае за ўчыненыя ім злачынствы.
Сёння ж у судзе стала вядома, што жонка Жукава пагасіла інкрымінаваную яму шкоду. Даведка аб пералічэнні 912 рублёў была далучаная да справы.
Цяпер чытаюць
Фядута рэзка адказаў Калеснікавай: За што вы змагаліся ў 2020 годзе, не цікавіць нікога, акрамя мядзведзяў з берлінскага заапарка, якія вас атачаюць4949
Каментары