Расія паважае суверэннае права Беларусі ўводзіць бязвізавы рэжым для іншых дзяржаў, але вымушаная думаць аб абароне сваіх грамадзян. Пра гэта ў інтэрв'ю ТАСС заявіў расійскі пасол Аляксандр Сурыкаў, каментуючы ўвядзенне Расіяй памежнай зоны.
— Расія вядзе актыўную барацьбу з тэрарызмам, прычым са зброяй у руках. У Сірыі прысутнічаюць нашы ВКС. Гэта ўсё добра вядома любому грамадзяніну Расіі і Беларусі. У гэтай складанай для нас сітуацыі, якая ўзнікла зусім нядаўна, я не выключаю, што ў свеце — асабліва ў ІД, радыкальнай частцы — шмат ахвотных пабедакурыць у Расіі, злых людзей, настроеных супраць расіянаў. У нас ёсць рэальныя асцярогі, што, скарыстаўшыся бязвізавым рэжымам уезду ў Рэспубліку Беларусь, супраць чаго мы зусім не пярэчым, гэтыя нядобрыя людзі перасядуць на цягнік або самалёт у Расію і могуць зрабіць нейкія непрыемныя рэчы, — растлумачыў Аляксандр Сурыкаў.
Паводле яго слоў, каб папярэдзіць «гэтыя магчымыя рэчы», Расія і ўвяла памежную зону на мяжы паміж нашымі краінамі. Сурыкаў падкрэсліў, што для расіянаў і беларусаў з яе увядзеннем нічога не зменіцца.
— Як заязджалі грамадзяне Беларусі на тэрыторыю РФ і грамадзяне Расіі на тэрыторыю Беларусі, так і будзе. Ніякіх абмежаванняў няма. Але грамадзяне трэціх краін павінны разумець, трапляючы ў памежную зону, што будуць пытанні.
Расійскі пасол таксама дадаў, што магчымасць вяртання да пашпартнага кантролю ў сувязі з увядзеннем памежнай зоны «пакуль не абмяркоўваецца і не разглядаецца».
Каментары