Дэкан факультэта філасофіі БДУ быў у Маскве ў кампаніі з кіраўніком «Румола»
У гэтыя дні ў Маскве праходзіць «Міжнародны форум па развіцці парламентарызму». Тэмы круглых сталоў, напрыклад, «Расія і Афрыканскі саюз», «Міжпарламенцкае ўзаемадзеянне Расія — Лацінская Амерыка».
З еўрапейскіх краін прыехалі некалькі чалавек. Беларускі парламент прадстаўляў віцэ-спікер Баляслаў Пірштук.
Ёсць і «экспертнае кола». Якіх экспертаў па парламентарызме запрасілі расіяне?
Яны ўсе разам зрабілі сумеснае фота.
На ім можна ўбачыць дэкана факультэта філасофіі і сацыяльных навук БДУ Вадзіма Гігіна (справа), а таксама тэлеспікераў Аляксандра Шпакоўскага (у цэнтры), Аляксея Дзермана (другі справа) і былога неанацыста Сяргея Лушча (другі злева).
Лушч быў вядомы як лідар рускай нацыяналістычнай арганізацыі «Румол», а раней як «жрэц» антысеміцкай паганскай секты «Схорон Еж Словен».
Чытайце таксама: Ад неанацызму і змагання з «юда-хрысціянскай акупацыяй» да студыі Давыдзькі: спецматэрыял пра кіраўніка «Румола» Сяргея Лушча
Дэкан факультэта філасофіі БДУ Вадзім Гігін не адказаў на паведамленне з просьбай аб каментары.
Хто аплачваў паездку беларусаў у Маскву?
У прэс-службе Палаты прадстаўнікоў запэўніваюць, што грошы з бюджэту не выдзяляліся:
«Дэлегат ад Палаты прадстаўнікоў — Пірштук. Але ён і іншыя беларусы — гэта не адна дэлегацыя, адназначна. Мерапрыемства, здаецца, было арганізавана пад эгідай расійскага Федэральнага сходу. Яны і запрашаюць удзельнікаў самастойна. Палата прадстаўнікоў — гэта дзяржаўны орган, які не можа адказваць за бог ведае каго», — патлумачылі ў прэс-службе.
Каментары