Генеральны дырэктар хакейнага мінскага «Дынама» Дзмітрый Баскаў звярнуўся з адкрытым лістом на адрас спартыўнай грамадскасці, паведамляе «Прессбол».
«На правах чалавека, з малых гадоў выхаванага ў спорце, з пазіцыі неабыякавай да людзей, якія аддаюць лепшыя гады свайго жыцця трэніроўкам і барацьбе за перамогі дзеля сябе, сваёй сям'і і сваёй краіны, я хачу звярнуцца да кожнага прафесійнага спартсмена.
Пішучы пра дасягненні беларускага спорту, Баскаў адзначае:
«У няпросты перыяд, калі дзяржава падвяргаецца крытыцы адусюль і з любой нагоды, мне асабліва крыўдна чытаць каментары спартсменаў, для якіх дзяржава зрабіла сапраўды шмат чаго. Магчыма, справядлівыя тэзісы пра тое, што дзяржава павінна больш падтрымаць дактароў ці настаўнікаў, але ўмовы для спартсменаў у нашай краіне заўсёды былі годнымі. Наўрад ці ў сённяшняй Беларусі з гэтым хтосьці паспрачаецца. І ў часы, калі настаўнікі і дактары, не з'яўляючыся прадстаўнікамі самых высокааплатных прафесій, працуюць на месцах, не адцягваючыся на балбатню ў сацсетках, некаторыя прадстаўнікі спартыўнай эліты дазваляюць сабе крытычныя выказванні ў адрас дзяржавы, якая іх выхавала і дазволіла заставацца ў спорце, ні ў чым не маючы патрэбы.
Вядома, варта адзначыць, што гэтыя подлыя рэплікі гучаць у асноўным ад тых, чые перамогі даўно ззаду і хто наўрад ці сёння складзе канкурэнцыю новым пакаленням, а таму не мае права разлічваць на падтрымку таго, пра каго крытычна выказваецца, але ж гэта не адмяняе элементарнай падзякі за доўгія гады ў прафесіі.
Калі б не дзяржаўная падтрымка — амаль ніхто з беларускіх спартсменаў не пабудаваў бы прафесійнай кар'еры. Для мяне гэта аксіёма. Такая ж, як калі б не бацькоўская падтрымка — ніхто з нас не вырас бы тым, кім з'яўляецца.
«…Я нават беспамылкова магу назваць імя чалавека, улюбёнага ў спорт, дзякуючы якому да сваіх спартовых мар усе гэтыя гады ішлі дзясяткі тысяч юнакоў і дзяўчат. Не ўсе з іх сталі чэмпіёнамі або выйгралі Алімпіяду, але кожнаму ёсць, што ўспомніць і чым ганарыцца. І кожнаму ёсць, каму быць удзячным за свой шчаслівы спартовы час. Давайце будзем сумленныя перад сабой:
калі б не Прэзідэнт і ўмовы, якія створаны, наўрад ці мы мелі столькі спартыўных школ, стадыёнаў, лядовых арэн па ўсёй краіне, а як вынік — беларускі сцяг на столькіх сусветных п'едэсталах.
Учора я ганарыўся кожным беларускім спартсменам, а сёння за некаторых з іх мне сорамна. Многія з тых, хто сёння набраўся нахабства паліваць брудам дзяржаву, былі падтрыманыя ёй жа ў не самыя паспяховыя для сябе перыяды кар'еры. Дзяржава ў іх верыла і падстаўляла плячо. А сёння, калі самы час адказаць узаемнасцю, хтосьці дазваляе сабе нізкія, подлыя каментары. Гэта не што іншае, як подласць.
Разам з тым, я б хацеў выказаць падзяку кожнаму спартсмену і спартыўнай арганізацыі, якія сёння знайшлі ў сабе смеласць выказаць такую «непапулярную», як паказваюць водгукі ў інтэрнэце, пазіцыю падзякі. Сумленную, адкрытую, годную, выхаванага чалавека з патрыятызмам ў сэрцы.
Памятайце галоўнае: у жыцці, як і ў спорце, перамагае мацнейшы», — напісаў Баскаў.
Адзначым, у апошні час супраць таго, што адбываецца падчас перадвыбарнай кампаніі, выказаліся лёгкаатлетка Надзея Астапчук, баскетбаліст Мікіта Мешчаракоў, баксёр Кірыл Рэліх, фрыстайлістка Аляксандра Раманоўская, баскетбалістка Алена Леўчанка.
Каментары