Et si tu n'existais pas. Топ-20 хітоў на французскай мове, якія вы дакладна ведаеце

Alizée — Moi… Lolita

У 2000 годзе Alizée ўварвалася ў сусветныя чарты са сваім дэбютным сінглам, прадзюсаркай якога была іншая французская зорка — Мілен Фармэр.

Для новага праекту Фармэр быў патрэбны малады голас. Таму 15-гадовая Алізэ Жакатэ, якая акурат перамагла ў тэлешоу пачынаючых талентаў, стала найлепшай кандыдатурай.

Desireless — Voyage voyage

Лідарства франкамоўных песень у міжнародных чартах — з'ява досыць рэдкая, але спявачка Desireless здолела скарыць хіт-парады дзясяткаў краін і стаць папулярнай у тым ліку і ў СССР.

Чалавеку без ведання французскай было проста спяваць прыпеў гэтай песні, бо трэба было запомніць толькі адно слова.

Joe Dassin — Et si tu n'existais pas

Калі аўтары пісалі чарговы хіт французскаму сэкс-сімвалу 1970-х Джо Дасэну, меркавалі, што галоўным радком стане: «Калі б не было кахання». Але паўстала дылема: калі няма кахання, то няма нічога. Як тады быць?

У выніку песня ўвайшла ў гісторыю пад назвай «Калі б не было цябе» і скарыла мільёны жаночых сэрцаў.

Zaz — Je veux

Спявачку Ізабэль Жэфруа часта параўноўваюць з Эдыт Піаф. Сапраўды, у пачатку сваёй кар'еры Zaz (псеўданім Жэфруа) выконвала на канцэртах песні вялікай французскай спявачкі, але стала папулярнай дзякуючы сваім хітам. «Je veux» быў першым.

K-Maro — Femme Like U

Гэты хіт канадскага рэпера K-Maro ўваходзіць у дваццатку самых папулярных песень у Францыі, выпушчаных у XXI стагоддзі. Але песня стала папулярнай і ў нашай краіне: яе вельмі актыўна круцілі па радыё.

Dalida, Alain Delon — Paroles paroles

Мала хто ведае, што гэты французскі хіт, выкананы зоркамі шансону і кінематографу, з'яўляецца каверам на італьянскую песню. Арыгінальная кампазіцыя італьянцаў Міны і Альберта Лула аказалася менш папулярнай.

Indila — Dernière danse

Індзіла — адна з зорак сучаснай французскай музыкі. Яе першая песня «Dernière danse» («Апошні танец») на працягу 77 тыдняў трымалася ў хіт-парадах, а кліп сабраў 725 мільёнаў праглядаў на ютубе.

Charles Aznavour — La bohème

Гэту песню павінен быў выконваць Жорж Гетары ў аперэце «Месье Карнавал», але яе запісаў і выканаў Шарль Азнавур, што справакавала скандал паміж артыстамі і лэйбламі гуказапісу. У выніку музыкі памірыліся, а песня засталася адным з галоўных хітоў караля шансону. 

Ilona — Un monde parfait

Песню пра чароўную краіну з добрымі жывёламі Ілона Мітрэсі запісала, калі ёй было ўсяго 11 гадоў. «Un monde parfait» імгненна стала хітом, а юнай спявачцы прарочылі вялікую славу. Аднак у 14 год Ілона вырашыла спыніць канцэртную дзейнасць і сканцэнтравацца на вучобе.

Garou, Patrick Fiori, Daniel Lavoie — Belle

Цэнтральная песня мюзікла «Notre-Dame de Paris», у якой гарбун Квазімода, святар Фрало і капітан лучнікаў Феб прызнаюцца ў каханні да Эсмеральды. Хіт выходзіў як асобны сінгл, а таксама быў перакладзены на дзясятак моваў.

In-Grid — Tu Es Foutu

За бадзёрай мелодыяй хаваецца тэкст пра расстанне. Хлопец так надакучыў дзяўчыне сваімі пустымі абяцанкамі, што тая яму кажа: «Ты нягоднік» (Tu Es Foutu).

Patricia Kaas — Mademoiselle chante le blues

Кар'ера Патрысіі Каас, спявачкі з прыгожым нізкім голасам, не адразу пайшла ўгару. Яе першы сінгл быў правальным, а песню пра мадэмуазэль, што спявае блюз, Каас сама насіла на радыёстанцыі і маліла, каб яе ўзялі.

Mylène Farmer — California

Пра Мілен Фармэр мы згадвалі як пра паспяховую прадзюсарку, але не забываем, што яна застаецца культавай спявачкай, чые песні слухаюць мільёны людзей. Тэкст кампазіцыі «California» захоплівае тэму шляху і поўны франка-англамоўных каламбураў.

Édith Piaf — Non, Je ne regrette rien

Песня-візітоўка Эдыт Піяф прысвечана салдатам замежнага французскага легіёну. Пасля няўдалага путча яны, назаўсёды пакідаючы свае казармы ў Алжыры, спявалі: «Я ні пра што не шкадую».

Amel Bent — Ma philosophie

У сваёй першай песні «Мая філасофія» спявачка Амэль Бент сфармулявала сваё жыццёвае крэда: заставацца сабой і высока трымаць галаву ў выпрабаваннях. Дзяўчына з сям'і імігрантаў выдатна разумела, што гэта такое, таму, відаць, песня і стала такой папулярнай.

Mireille Mathieu — Pardonne-moi ce caprice d'enfant

Кампазіцыя Мірэй Мацьё з'яўляецца, па сутнасці, мальбой жанчыны да каханага мужчыны, якога яна кінула дзеля новых адчуванняў, дараваць ёй гэты капрыз. З кожным новым раманам гераіня песні ўсё больш пераконваецца ў тым, што кахае толькі таго мужчыну, якога кінула.

Stromae — Alors on danse

Звычайна неангламоўныя песні маюць лакальны поспех, але хіт бельгійскага рэпера здабыў папулярнасць ва ўсім свеце, месяцамі лідзіруючы ў хіт-парадах. А відэа на ютубе набрала больш за 260 мільёнаў праглядаў.

Vanessa Paradis — Joe le taxi

Былой жонцы Джоні Дэпа было ўсяго 14 гадоў, калі яна запісала песню пра таксіста Джо, які лепш за астатніх ведае Парыж і ягоныя месцы. Ён любіць піць ром, лацінскія танцы і свой жоўты саксафон.

Charles Aznavour — Une vie d'amour

Арыгінальная песня пра вечнае каханне была запісаная Шарлем Азнавурам для альбома «Autobiographie». На ім жа была і рускамоўная версія, выкананая ў дуэце з Мірэй Мацьё, якая таксама спявала яе і асобна.

Lara Fabian — Je t'aime

У песні «Je t'aime» з'явілася спачатку музыка — яе напісаў прадзюсар Рык Алiсан, знаходзячыся пад уражаннем ад іншага французскага суперхіта Je suis malade, які Лара выканала разам з Сержам Лама на ягоным канцэрце. Фабіян жа з'яўляецца аўтаркай тэксту песні.

А1 Xplore Music ад Deezer — гэта музычны прадукт А1. Алгарытмы дадатку Deezer дазваляюць карыстальнікам А1 Xplore Music ад Deezer атрымліваць персанальныя рэкамендацыі па падборы трэкаў, карыстацца ўбудаванай у платформу функцыяй распазнавання песень і слухаць любімую музыку, аўдыякнігі і падкасты з высокай якасцю гуку без перапынкаў на рэкламу.

• 6
• 0
• 0
• 5
• 2
• 4
• 7
• 0