Наталлю Хершэ трымаюць адну ў камеры. Угаворваюць напісаць прашэнне аб памілаванні
Наталля Хершэ, асуджаная за сарваную балаклаву, амаль два месяцы правяла ў штрафным ізалятары ў калоніі, дзе нават не выдаюць пасцельную бялізну. Так яе пакаралі за адмову шыць форму сілавікам і іншыя парушэнні. Цяпер яе перавялі ў камеру, дзе яна сядзіць адна. І ўгаворваюць пісаць прашэнне аб памілаванне на імя Лукашэнкі.
Цяпер Наталля знаходзіцца ў памяшканні камернага тыпу. Гэта камера з больш строгім рэжымам утрымання.
«Яе можна назваць мяккім карцарам. Там ёсць ложак, стол, крэсла, пасцеля. Можна замаўляць кнігі з бібліятэкі, дазволены паўгадзінныя шпацыры на паветры кожны дзень. У ПКТ Наталля адна. Яна кажа, што для яе гэта лепш, чым у атрадзе, бо можна не працаваць. Псіхалагічны стан у яе такі, што ёй хочацца пабыць адной, адпачыць. Са слоў адваката, выглядае яна нядрэнна», — расказаў НН яе брат Генадзь.
Ужо больш за два месяцы ён не атрымлівае ад сястры ні лістоў, ні званкоў. Застаюцца толькі размовы праз адваката.
«Мае два лісты ёй не перадалі з-за таго, што яны маюць «экстрэмісцкую рыторыку». Я пісаў, што няма справядлівасці ў краіне», — кажа Генадзь.
Цяпер Наталлі дазволена ліставанне, але спатканні забаронены. У пакупках яна абмежавана — у краме жанчына можа патраціць адну базавую велічыню ў месяц (29 рублёў).
«Дадаткова раз на месяц я магу замовіць для яе праз інтэрнэт-краму фруктовую пасылку да 10 кг. Гэта апельсіны, лімоны, яблыкі, таматы і цыбуля. Наталля казала, што да яе тройчы прыходзілі з пытаннем, ці будзе яна пісаць прашэнне аб памілаванні. З розных устаноў, у тым ліку з адміністрацыі калоніі. Яна адмовілася, бо лічыць, што пісаць прашэнне значыць прызнаць сябе вінаватай».
-
«Я толькі аднаго хачу: каб вы паверылі мне зноў». Як прайшла першая акцыя Ціханоўскага ў Варшаве пасля вызвалення
-
У Ляхавічах школьнік падчас футбольнага матча вывеў на табло нецэнзурнае слова. Як яму гэта ўдалося?
-
На папцы ў Святланы Ціханоўскай цяпер партрэт палітзняволенага журналіста Андрэя Пачобута ФОТА
Каментары