У Вілейцы 29 верасня загадчыца рэанімацыі Вілейскай раённай бальніцы Вікторыя Семянковіч правяла сустрэчу з работнікамі дарожнага рамонтна-будаўнічага ўпраўлення, на якой расказала пра сітуацыю з каранавірусам у рэгіёне, а таксама параўнала з сітуацыяй у Маладзечне і Слуцку, паведамляе «Шлях перамогі».
«У Вілейцы на сёння складваецца такая сітуацыя, што ў чацвёртую хвалю масава хварэюць моладзь і дзеці. Захворванне працякае вельмі хутка, стан людзей пагаршаецца за два-тры дні», — распавяла на сустрэчы Вікторыя Віктараўна.
Таксама яна распавяла, што іх аддзяленне рэанімацыі прышчэплена на 100%: ніхто з супрацоўнікаў не хварэў ні ў адну хвалю.
«Калі прышчэплены і хварэе, то ў лёгкай форме, не трапляючы ў бальніцу», — кажа доктар.
«У Вілейцы ў аддзяленні цяпер ляжаць 70 чалавек, у рэанімацыі — 9. Сярод іх няма ніводнага прышчэпленага чалавека. Такую статыстыку мы прыводзім для скептыкаў. У Маладзечне ляжыць 189 хворых з COVID-19. У Слуцку — за ўчорашні дзень 393, ніхто з іх не прышчэплены».
«Страшна, што хварэюць маладыя людзі, кожная новая хваля амалоджваецца. Вельмі шмат хварэе дзяцей. У Маладзечне на базе дзіцячай бальніцы адкрыта аддзяленне на 50 ложкаў, усё аддзяленне занята. Дзеці хварэюць не так цяжка, як дарослыя, але яны вельмі моцна распаўсюджваюць інфекцыю» — падкрэслівае Вікторыя Семянковіч.
Па яе словах, усе людзі, у якіх ёсць хранічныя захворванні, напрыклад цукровы дыябет, павінны прышчапляцца ў першую чаргу.
«Хвароба працякае не як пнеўманія. У пацыентаў масіўнае тромбаўтварэнне, забіваюцца лёгкія, людзі не могуць зрабіць ўдых і не могуць адкашляцца», — кажа доктар.
Цяпер чытаюць
Хто такі Мацвей Бяляй, якога нібыта дэпартавалі ў Беларусь? Расказваем гісторыю дзіўнага актывіста з падазроным мінулым4
Каментары