Гісторыя, калі мужчына і жанчына займаліся сэксам на тэрыторыі базы адпачынку PublicBeachClub у Адэсе, стала рэзананснай ва Украіне. Відэазапіс абышоў практычна ўсе ўкраінскія інфармацыйныя тэлеграм-каналы.
Вельмі аператыўна на дзеянні пары адрэагаваў дарадца кіраўніка Адэскай абласной вайсковай дзяржаўнай адміністрацыі Сяргей Братчук. Ён заявіў, што пару накіравалі на медыцынскую камісію з далейшым накіраваннем на службу ў войска.
Аднак папраўдзе суд абмежаваў перамяшчэнні абодвух фігурантаў справы хатнім арыштам, а паліцыя завяла справу супраць іх паводле ч. 2 артыкула 296 Крымінальнага кодэкса Украіны (хуліганства — парушэнне грамадскага парадку па матывах відавочнай непавагі да грамадства, якое суправаджаецца асаблівай дзёрзкасцю або выключным цынізмам, учыненае групай асобаў).
За гэтыя дзеянні прадугледжаная крымінальная адказнасць — абмежаванне волі на тэрмін да пяці гадоў або пазбаўленне волі на тэрмін да чатырох гадоў.
Першага ліпеня адэскі суд вынес прыгавор: грамадзянін Беларусі асуджаны на паўтара года пазбаўлення волі, а жанчына — на адзін год пазбаўлення волі. Суд вызваліў іх ад адбывання пакарання на адзін год, цягам якога яны мусяць перыядычна адзначацца ў органах прабацыі, не выязджаць з Украіны, а таксама паведамляць пра змену месца пражывання, працы або навучання.
