Пракоп'ева «папрасілі» з Украіны? Ён кажа, што «выехаў ненадоўга». А полк «Пагоня» ўжо адправіўся на перадавую
Намеснік камандзіра палка «Пагоня» Вадзім Пракоп'еў пакінуў тэрыторыю Украіны. Наконт гэтага ходзіць шмат чутак, ажно да таго, што яго «папрасілі». Сам палітык кажа, што паехаў атрымліваць «жэнеўскі пашпарт», бо беларускі скончыўся. Частка байцоў яго «Пагоні» пры гэтым ужо ўчора адправілася на перадавую ў складзе брыгады асобнага прызначэння імя Івана Багуна.
Учора Пракоп'еў выступіў на форуме ў Берліне, прайшоўся па дарадцы Святланы Ціханоўскай Франаку Вячорку, а таксама прапанаваў палітычную схему, пры якой Ціханоўская становіцца «брытанскай каралевай», а пры ёй узнікае альтэрнатыўны ўрад з прэм'ер-міністрам, чыю кандыдатуру гатовы прапанаваць Пракоп'еў.
У задачы гэтага ўрада мае ўваходзіць і абавязак падрыхтоўкі сілавога блоку, чым офіс Ціханоўскай не займаецца.
Пры абмеркаванні экспрэсіўнага спічу палітыка ў чатах пачалі з'яўляцца паведамленні, што самога Пракоп'ева «папрасілі з Украіны». Ці так гэта? У каментарыі «Нашай Ніве» Пракоп'еў пацвярджае, што з Украіны выехаў, але называе прычыну.
«У мяне скончыўся пашпарт, я паехаў атрымліваць «жэнеўскі», пра які дамоўлена. Гэта зойме пару тыдняў, і паеду назад», — кажа Пракоп'еў.
Таксама ён расказаў пару словаў пра лёс палка «Пагоня», касцяк якога складаюць былыя байцы беларускіх сілаў спецыяльных аперацый.
«Наша аэравыведка трэніруецца ў Чэхіі, контрвыведка — у Польшчы і ва Украіне. Байцы, выхадцы з ССА, літаральна ўчора адправіліся на перадавую ў складзе асобнай брыгады спецыяльнага прызначэння імя Івана Багуна. Там жа і вайсковыя медыкі», — сказаў Пракоп'еў.
Ён таксама заявіў, што з'явіцца на форуме 9 жніўня, які будзе праводзіцца офісам Ціханоўскай да ўгодкаў выбараў. На ім будзе абмяркоўвацца, што рабіць далей.
Пракоп'еў хоча прыставіць да Ціханоўскай прэм'ера, «якога ведае ўся Украіна»
Цяпер чытаюць
«Быў галодны, як з Асвенціма, не еў ні мяса, ні гародніны». Што вядома пра смерць бабруйскага журналіста, на якога завялі крымінальную справу ў Польшчы2121
Каментары