Асноўныя прарасійскія партыі не прайшлі ў парламент Латвіі. Выбары выйграла партыя прэм’ера
Сенсацыяй выбараў стала тое, што галоўныя прарасійскія партыі не трапілі ў парламент.
Па выніках падліку 100% галасоў на парламенцкіх выбарах у Латвіі 5-працэнтны бар'ер пераадолелі сем партый. Найбольшую колькасць галасоў атрымала «Новае адзінства» дзейнага прэм’ер-міністра Крыш’яніса Карыньша з 18,97% (26 мандатаў).
На другім месцы — «Саюз «зялёных» і сялян» (12,44% — 16 мандатаў), далей — «Аб’яднаны спіс» (11,01% — 15 мандатаў), «Нацыянальнае аб’яднанне» (9,29% — 13 мандатаў), «За стабільнасць» (6,80% — 11 мандатаў), «Латвія на першым месцы» (6,24% — 9 мандатаў), «Прагрэсіўныя» (6,16% — 10 мандатаў).
Сенсацыяй выбараў стала тое, што галоўныя прарасійскія партыі не трапілі ў парламент. Партыя «Згода», пераможца выбараў 2018 года, якую традыцыйна падтрымлівалі прарасійскія сілы, набрала толькі 4,81%. У прапуцінскага «Рускага саюза Латвіі» — 3,63%.
У той жа час у парламент удалося трапіць нядаўна заснаванай партыі «За стабільнасць», якая ўзначальваецца былым актывістам «Згоды» Аляксеем Рослікавым. Гэта папулісцкая партыя, якая выступае за дазвол на галасаванне неграмадзянам і супраць вакцынацыі ад каранавіруса.
Каментары