У мінскім Чырвоным касцёле пройдуць дні ўспаміну Папы Яна Паўла ІІ
16—18 кастрычніка у мінскім касцёле святых Сымона і Алены (Чырвоным касцёле) пройдуць дні ўспаміну Папы Яна Паўла ІІ.
Цырымонія адбудзецца з нагоды 21‑й гадавіны абрання кардынала Караля Вайтылы на святы пасад, паведаміў пробашч касцёла, ксёндз‑магістр Уладзіслаў Завальнюк.
Паводле яго слоў, у гэтыя тры дні набажэнствы будуць праводзіцца дзеля найхутчэйшай беатыфікацыі Яна Паўла II.
16 кастрычніка пасля святой эўхарыстыі (пачатак а 19.00) адбудзецца канцэрт і вечар паэзіі, прысвечаны Яну Паўлу ІІ. 17 кастрычніка пасля святой літургіі (пачатак а 20.30) запланаваны дабрачынны канцэрт «Чыстае сэрца», падчас якога выступяць Аляксандр Патліс (Беларусь), Дэні Плэт (Германія) і саліст беларускай оперы Ілья Сільчукоў. Пасля канцэрта на выхадзе са святыні можна будзе скласці ахвяраванні, якія плануецца выкарыстаць на дабрачынныя справы.
Нядзельная святая імша 19 кастрычніка (пачатак у 13.00) стане завяршэннем дзён успаміну Яна Паўла ІІ.
Паводле слоў ксяндза Уладзіслава, для ўдзелу ў днях будуць запрошаны апостальскі нунцый у Беларусі арцыбіскуп Марцін Відавіч, мітрапаліт Мінска‑Магілёўскі арцыбіскуп Тадэвуш Кандрусевіч, біскуп Антоні Дзям’янка, а таксама святары сталічных парафій.
Ксёндз Уладзіслаў запрасіў вернікаў да ўдзелу ў малітоўнай праграме, каб, паводле яго слоў, «праз заступніцтва слугі Божага і згодна з воляю Бога выпрасіць неабходныя ласкі і ўзнесці просьбу аб найхутчэйшым далучэнні Яна Паўла ІІ да ліку святых».
Акцыя «Чыстае сэрца», арганізатарамі якой з’яўляюцца вернікі‑пратэстанты, у Беларусі ўпершыню прайшла восенню 2006 года. Выручка, атрыманая ад продажу білетаў на канцэрты, што адбыліся ў сямі гарадах краіны, была накіравана на падтрымку рэабілітацыйнага цэнтра «Новае жыццё» ў Баранавічах (Брэсцкая вобласць), на медыкаменты для дзяцей з захворваннямі сэрца, якія пражываюць у Брэсце, на рэканструкцыю дзіцячага аздараўленчага лагера ў Магілёве, а таксама на набыццё інвентару для дзіцячага сацыяльнага прытулку ў Оршы (Віцебская вобласць). Частка грошай была накіравана на дапамогу ВІЧ‑інфікаваным дзецям.
Цяпер чытаюць
Рэдактара незалежнай баранавіцкай газеты «Інтэкс-Прэс» Янукевіча прысудзілі да 14 гадоў калоніі, яго намесніка Пакаленку — да 12 гадоў9
Каментары