Вы здзівіцеся. У Белгідрамеце распавялі, колькі ў Беларусі было сонечных гадзін у снежні-студзені
За снежань і студзень у Беларусі было ўсяго два ясныя дні. А ёсць яшчэ паказчык «сонечнае ззянне».
Адзін ясны дзень у снежні прыйшоўся на жыхароў Гомеля, а ў студзені — на жыхароў Брэста, распавялі БелТА спецыялісты Белгідрамета.
У метэаралогіі ясным лічыцца дзень, калі на працягу сутак назіралася яснае або малавоблачнае (з нязначнай воблачнасцю) надвор'е.
«Найбольшая колькасць ясных дзён у снежні-студзені за перыяд назіранняў з 1991 па 2020 год была зафіксавана ў студзені 2014 года ў Віцебску і склала 10 дзён», — адзначылі ў Белгідрамеце.
Яшчэ адным паказчыкам сонечнасці ў метэаралогіі лічаць працягласць сонечнага ззяння. Яна выражаецца ў гадзінах і пазначае час, на працягу якога на небасхіле прысутнічае сонца, у тым ліку паміж прасветамі ў аблоках. Працягласць гэтага часу можа быць ад 0,1 гадзіны (ад 6 хвілін) і да максімальна магчымай у гэтыя халодныя месяцы (прыкладна да 7,5−8,5 гадзіны за адны суткі).
«Па гэтым паказчыку колькасць дзён з сонцам нават у зімовыя месяцы значна большая, чым ясных. Так, працягласць сонечнага ззяння ў Мінску ў снежні 2022 года склала 14,8 гадзіны, а ў студзені — 8,9 гадзіны», — растлумачылі ў Белгідрамеце.
Каментары